विद्यालय पोसाक बाहेक फरक पोसाक किन्न लगाउने विद्यालयलाई महानगरले कारवाही गर्ने चेतावनी
वि.सं.२०८० पुस ६ शुक्रवार ११:१३
काठमाडौं: काठमाडौं महानगरपालिकाले तोकिएको विद्यालय पोसाकबाहेक अन्य पोसाक किन्न विद्यार्थीलाई बाध्य नपार्न अनुरोध गरेको छ ।
महानगरले शुक्रबार एक सूचना जारी गर्दै विद्यार्थीहरूलाई अनावश्यक पोसाक किन्न बाध्य नपार्ने विद्यालयलाई भनेको छ । महानगरभित्र सञ्चालित केही विद्यालयहरूले विभिन्न चाडपर्वका नाममा विद्यार्थीहरूलाई नियमित विद्यालय पोसाकभन्दा फरक पोसाक किन्न बाध्य पारेको भन्ने गुनासो आएपछि महानगरले तोकिएको विद्यालय पोसाकभन्दा अन्य पोसाक नकिन्न भनेको हो ।
अटेरी गरी पोसाक किन्न लगाएको पाइएमा कारवाही गरिने महानगरले चेतावनी समेत दिएको छ । कोही कसैले परिपत्र विपरित कार्य गरेमा काठमाडौं महानगरपालिका शिक्षा ऐन र अन्य प्रचलित कानुनबमोजिम दण्ड सजाय हुने महानगरले जनाएको छ ।
वि.सं.२०८० पुस ६ शुक्रवार ११:१३