अखबार नेपाल ट्रेन्डिङ

काठमाडौं: अख्तियार दुरुपयोग अनुसन्धान आयोगको तथ्यांकअनुसार आर्थिक वर्ष ०७९/८० मा १ सचिव, १० सहसचिव, ५८ उपसचिव र १४६ शाखा अधिकृतलाई प्रतिवादी बनाएर विशेष अदालतमा मुद्दा दायर भएको छ ।

सार्वजनिक सम्पत्ति हानी नोक्सानीमा ५ जना सहसचिव, १२ जना उपसचिव र १७ जना शाखा अधिकृतविरुद्ध भ्रष्टाचारको आरोप लागेको छ । यस्तै गैरकानूनी सम्पत्ति आर्जनमा १ सहसचिव, २ उपसचिव र ६ जना शाखा अधिकृतविरुद्ध पनि अभियोग दायर भएको छ ।

घुस रिसवतमा १ जना उपसचिव र १३ जना शाखा अधिकृतविरुद्ध अभियोग लागेको अख्तियारले जनाएको छ । गैरकानूनी लाभहानीमा २ जना सहसचिव, ३० जना उपसचिव र ९१ जना शाखा अधिकृतले उक्त अवधिमा मुद्दा खेपेका छन् ।

यस्तै ११० नायब सुब्बा, ३० जना खरिदारविरुद्ध पनि अभियोग दायर भएको छ । त्यसबाहेक निर्वाचित र मनोनीत गरी कूल २०९ जनप्रतिनिधिविरुद्ध पनि भ्रष्टाचार मुद्दा दायर भएको अख्तियारले जनाएको छ । अख्तियारको तथ्यांकमा गत आर्थिक वर्षमा १६२ वटा मुद्दा दायर भएकामा ६२२ पुरुष, १३८ महिला र ६ जना संस्था प्रतिवादी बनेका छन् ।

सबैभन्दा बढी गैरकानूनी लाभ वा हानीमा ३ सय ६३ पुरुष र ७६ महिला तथा सार्वजनिक हानी नोक्सानीमा एक सय १४ पुरुष र ३७ महिला प्रतिवादी बनेका छन् ।