अखबार नेपाल ट्रेन्डिङ

काठमाडौं: नेपाली कांग्रेसको पार्टी कार्यालय सानेपामा बुधबार दिउँसो पत्रकार सम्मेलन गरेर कांग्रेस प्रवक्ता डा. प्रकाशशरण महतले गठबन्धनमा ठूलो विरोधाषमा रहेको बताएका छन् ।

कांग्रेसले हालको सत्ता गठबन्धनलाई अवसर केन्द्रित गठबन्धनको संज्ञा दिएको छ । प्रवक्ता महतले सत्ता गठबन्धन शुद्ध अवसर केन्द्रित गठबन्धन भएको बताए ।

महतले भने, ‘हाम्रै गठबन्धनको सरकार बन्छ भन्ने जनअपेक्षा थियो । गठबन्धनका नेतृत्वले पनि गठबन्धन नभत्किने प्रतिबद्धता गरेका थिए । प्रचण्डबाट प्रतिबद्धता पूरा नगरी गठबन्धन छोडेर जानुभयो । यद्यपि हामीले गठबन्धनलाई निरन्तरता दिने कोशिस गरेका थियौं ।’

‘यो गठबन्धन ठूलो विरोधाषमा हो । यो गठबन्धन स्वाभाविक देखिँदैन । यहाँ पदको प्रतिस्पर्धा छ,’ उनी भन्छन्, ‘सो कुराले यो गठबन्धनको आयु छोटिने सम्भावना देखिराखेका छौं ।’ सत्ता गठबन्धनमा विचार र दृष्टिकोणमा एकता नभएको महतले बताए । ‘गठबन्धनमा विचार दृष्टिकोणमा एकता छैन । नो नट अगेनको नारा लगाएर आएका नयाँ पार्टी पद प्राप्तिमा गएर टुंगिएको छ,’ उनले भने, ‘सरकारमै बसेर प्रतिपक्षी भूमिका गर्ने कुरा आएको छ । कन्टेन भन्दा प्रचार बढी केन्द्रित भइरहेको हामीले देखिरहेका छौं ।’

वैकल्पिक समर्थन जुटाउने विषयलाई आफूहरूले कहिल्यै प्राथमिकता नदिएको उनको भनाइ छ । गठबन्धन टुट्नुमा कांग्रेस दोषी नभएको उनले प्रस्टीकरण दिए । ‘प्रचण्डलाई सरकारको नेतृत्व दिएर गठबन्धन बचाउने जाने कि भन्नेबारे सोँच्ने र निर्णयमा पुग्ने समय भएन। यो गठबन्धन अवसर केन्द्रित गठबन्धन हो । राजतन्त्र चाहिने, नचाहिने, संघीयताको विरोध र समर्थन गर्ने विभिन्न रूपरङका पार्टी छन्,’ उनले भने । उनले कांग्रेस सशक्त प्रतिपक्षी बन्ने बताए । ‘कांग्रेसले संसदमा प्रभावकारी प्रतिपक्षीको भूमिका निर्वाह गर्छ । सरकारका गलत क्रियाकलापको भण्डाफोर गर्छ,’ उनले भने ।