अखबार नेपाल ट्रेन्डिङ

काठमाडौं: नेकपा माओवादी केन्द्रको पदाधिकारी बैठक पेरिसडाँडामा सुरु भएको छ । सरकारमा पार्टीका तर्फबाट पठाउने मन्त्रीहरुको विषयमा छलफल गर्न पदाधिकारी बैठक बसेको हो ।

पार्टी मुख्यालयमा जारी बैठकमा नयाँ सत्ता समीकरणसँगै विकसित राजनीतिक घटनाक्रम, आगामी सरकारमा पार्टीको भूमिका लगायतको विषयमा छलफल हुने माओवादीले जनाएको छ ।

एमाले नेतृत्वको नयाँ बनेको गठबन्धनमा माओवादी अध्यक्ष पुष्पकमल दाहाल ‘प्रचण्ड’ प्रधानमन्त्रीमा नियुक्त भएका छन् । एमाले अध्यक्ष केपी शर्मा ओलीसहितको समर्थनमा ‘प्रचण्ड’तेस्रो पटक प्रधानमन्त्रीमा नियुक्त भएका छन् ।

प्रचण्डलाई आइतबार साँझ राष्ट्रपति विद्यादेवी भण्डारीले संविधानको धारा ७६ (२) बमोजिम प्रधानमन्त्रीमा नियुक्त गरेकी हुन् ।

२७५ रहेको प्रतिनिधिसभामा बहुमतका लागि १३८ चाहिन्छ । प्रधानमन्त्री पाएको माओवादी केन्द्रको ३२ सिट छ । प्रधानमन्त्री बनेका प्रचण्डलाई एमालेको ७८, राष्ट्रिय स्वतन्त्र पार्टीको २०, राष्ट्रिय प्रजातन्त्र पार्टीको १४, जनता समाजवादी पार्टीको १२, जनमत पार्टीको ६, नागरिक उन्मुक्ति पार्टीको ४ र तीन जना स्वतन्त्र सांसदको समर्थन छ ।

संविधानको धारा ७६ को उपधारा (२) बमोजिम नियुक्त प्रधानमन्त्रीले त्यसरी नियुक्त भएको मितिले ३० दिनभित्र प्रतिनिधिसभाबाट विश्वासको मत प्राप्त गर्नु पर्नेछ ।