अखबार नेपाल ट्रेन्डिङ

काठमाडौं: नेपाल कम्युनिस्ट पार्टीका संस्थापक महासचिव पुप्पलाल श्रेष्ठको ४१ औँ स्मृति आज विभिन्न कार्यक्रमका साथ मनाइँदै छ ।

नेपालमा कम्युनिस्ट पार्टी स्थापना गरी विस्तार गर्न महत्वपूर्ण भूमिका निर्वाह गरेका पुष्पलालको जन्म विक्रम सम्वत १९८१ असार १५ गते रामेछाप जिल्लाको भँगेरी गाउँमा भएको थियो । विक्रम सम्वत १९९७ मा दाजु गंगालाललाई राणाशासन फाल्न लागेको आरोपमा गोली हानी हत्या गरिएपछि दाजुको अभियानलाई पूरा गर्नका लागि पुष्पलाल राजनीतिमा प्रवेश गरेका थिए ।

२००६ वैशाखमा चार जना साथी निरञ्जनगोविन्द वैद्य, नारायणविलास जोशी, नरबहादुर कर्माचार्य र मोतीदेवी शाक्यसँग मिलेर उनले भारतको कोलकातामा बसेर नेकपा स्थापना गरेका थिए । नेपालको गहिरो इतिहास अध्ययन गरेका नेता पुष्पलालका केही पुस्तक पनि प्रकाशित छन् । उनले स्थापना गरेको नेकपाबाट अहिले नेपाल कम्युनिष्ट पार्टी नेकपा, नेकपा माले, नेकपा संयुक्त, नेमकिपा, नेकपा क्रान्तिकारी माओवादी, नेकपा, नेकपा माक्र्सवादी, नेकपा मसाललगायतका पार्टीमा विभाजित अवस्थामा अस्तित्वमा छन् ।

नेपालमा साम्यवादी विचारको प्रचार गर्नका लागि पहिलो पटक कम्युनिस्ट पार्टीको घोषणापत्र नेपालीमा अनुवाद गरेका पुष्पलालको विक्रम सम्वत २०३५ साउन ७ गते भारतको नयाँदिल्लीमा उपचारका क्रममा निधन भएको थियो ।