अखबार नेपाल ट्रेन्डिङ

काठमाडौं: नेपालमा अवैध क्रिफ्टोकरेन्सीको कारोबारमा संलग्न भएको अभियोगमा ३७ करोड ६४ लाख ११ हजार एक सय बराबरको बिगो कायम गरी मुद्दा दायर भएको छ ।

राजस्व अनुसन्धान विभागले मंगलबार काठमाडौं जिल्ला अदालतमा गरेको मुद्दामा एउटा परिवारकै संलग्नता रहेको दाबी गरिएको छ ।

विभागका अनुसार कैलाली लम्कीचुहा-१०, स्थायी घर भई हाल काठमाडौंको कालो पुलमा बस्दै आएका दिनेश खड्काको परिवारमाथि मुद्दा दर्ता गरेको हो ।

खड्काले ई-स्क्रेलल र बाइनान्स नामको एपमार्तफ पैसाको कारोबार गर्थे । यो यस्तो एप मानिन्छ, जसमा डलरको कारोबार हुने गर्छ ।

यस्तै, गत माघ ७ गते क्रिप्टो करेन्सी र बिट क्वाइनबाट वित्तिय कारोबार गर्ने तीन जनालाई प्रहरीले काठमाडौंबाट पक्राउ गर्‍यो ।

महानगरीय अपराध महाशाखाको टोलीले मीनभवनबाट तीन जनालाई पक्राउ गरेको थियो । पक्राउ पर्नेमा पर्वत फलेवास नगरपालिका- ११ कर्नास घर भई पोखरा बस्ने २१ वर्षीय राजन भट्टराई, सुनसरी इटहरी उपमहानगरपालिका-४ बस्ने २५ वर्षीय विशाल श्रेष्ठ र काठमाडौं-११ थापाथली बस्ने २७ वर्षीय  दीपेनराज श्रेष्ठ छन् ।

पक्राउ व्यक्तिहरू मध्येका राजन भट्टराईले हालसम्म ९ सय ७५ जनासँग एक हजार ९ सय २६ पटक कारोबार गरेको तथा मंसिरदेखि पुससम्म लगभग २६ लाख रुपैयाँको कारोबार गरेको अनुसन्धानबाट खुलेको महाशाखाले जनाएको छ ।

अन्य दुई जनाले समेत कारोबार गरेको देखिएको प्रहरीले जनाएको छ ।

पक्राउ परेकाहरूलाई बैंक तथा वित्तिय संस्था सम्बन्धी ऐन, २०७३ बमोजिम आवश्यक कारबाहीको लागि कानूनी प्रक्रिया अगाडि बढाइएको प्रहरीले जनाएको छ ।

यसैबीच नेपाल प्रहरीको केन्द्रीय अनुसन्धान ब्यूरोका अनुसार नेपालमा क्रिप्टोकरेन्सी सम्बन्धी केही घटनाहरू भएको जनाएको छ । ब्यूरोका प्रवक्ता प्रहरी उपरीक्षक श्याम कुमार महतोले  हालसम्म क्रिप्टोकरेन्सीका ५ वटा घटना अनुसन्धान भएको जानकारी दिए ।

‘क्रिप्टोकरेन्सीको उजूरी विशेष गरि कहिलेकाहीँ राज्यका विभिन्न निकायबाट नै आउने गरेको छ । भौतिक रुपमा नभइ यो अनलाइनका रुपमा हुने भएकाले यसमा संग्लनलाई खोज्न असहज भएपनि कठिन भने छैन’, प्रवक्ता महतोले भने ।

आइतबार एक विज्ञप्ति जारी गर्दै नेपाल राष्ट्र बैंकले गैर कानुनी भर्चुअल करेन्सी अर्थात् क्रिप्टोकरेन्सी कारोबारमा संलग्नलाई कडा कारबाही गर्ने जनाएको छ ।

राष्ट्र बैंकले पछिल्लो समय बजारमा क्रिप्टोकरेन्सी जस्ता गैरकानुनी भर्चुअल मुद्राहरूको कारोबार बढेको, कारोबार गर्न प्रेरित गरेको र सोझालाई फसाउने कार्य बढेको सुनिएको भन्दै सो विषयप्रति बैंकको ध्यानाकर्षण भएको जनाएको हो ।

क्रिप्टोकरेन्सीको विशेषता भनेको डिजिटल वा भर्चुअल अर्थात् कुनै भौतिक अस्तित्व नभएका मुद्रा हो । यसलाई नेपालको केन्द्रीय बैंकले मान्यता नदिएको कारणले यो धन्दा गैह्रकानूनी हो ।

विभिन्न एपमार्फत डलरको आदानप्रदान गर्ने भएकोले यो सोझै व्यक्तिको हातमा वा बैंकको खातामा पुग्छ । गलत काम विरुद्ध सर्वसाधारणलाई सुसूचित बनाउन, वित्तिय साक्षरताको टुलका रुपमा बैंकले विज्ञप्ती जारी गरिसकेको छ ।

क्रिप्टोकरेन्सीको हकमा केहि मान्छेहरू ठगिएको भन्ने सुचना राष्ट्र बैंकले पनि प्राप्त गरेको छ । क्रिप्टोकरेन्सीलाई राज्यले कानूनी मान्यता नदिएको कारणले यसतर्फ आकर्षण गराउने गिरोहलाई कानूनको दायरामा ल्याउने, नेपालमा कानुन कार्यान्वयनमा लागेका व्यक्ति वा संस्थाले यसलाई चासोको रुपमा हेरिरहेका ब्यूरोका प्रवक्ता महतोले बताए ।

यो नेटवर्किङ प्रकृतिको व्यवसाय छ । यसमा मान्छेलाई प्रलोभनमा पार्ने, कतिपय विषयमा आम सर्वसाधारणलाई थाहा नै नहुने महतोले जानकारी दिए ।

क्रिप्टोकरेन्सी: लोभले लाभ, लाभले विलाप