अखबार नेपाल ट्रेन्डिङ

काठमाडौं: प्रख्यात भारतीय गायिका आशा भोसलेको निधन भएको छ । हृदयाघात र श्वासप्रश्वास सम्बन्धी जटिलताका कारण शनिबार अस्पताल भर्ना गरिएकी भोसले ९२ वर्षको उमेरमा आइतबार दिउँसो अन्तिम सास फेरेको भारतीय सञ्चारमाध्यमले जनाएका छन् ।

धेरै महिनादेखि स्वास्थ्य समस्याहरूसँग लड्दै थिइन् र उनको अवस्था बिग्रियो । उनलाई शनिबार राति ब्रिच क्यान्डी अस्पतालको सघन हेरचाह इकाईमा भर्ना गरिएको थियो । उनका छोरा आनन्दले आइतबार दिउँसो खबर पुष्टि गरेको सञ्चारमाध्यमले जनाएका छन् । उनको अन्तिम संस्कार सोमबार गर्ने बताइएको छ ।

१९३३ मा मंगेशकर परिवारमा जन्मिएकी उनले सानै उमेरमा संगीतमा आफ्नो यात्रा शुरु गरेकी थिइन् । पारिवारिक वातावरण नै संगीतमय भएकाले उनी सानैमा यसतर्फ आकर्षित भएको बताइन्छ । उनले ९ वर्षकै उमेरमा व्यावसायिक रूपमा गाउन थालेकी थिइन् । १९४३ सम्ममा उनले आफ्नो पहिलो गीत रेकर्ड गराएकी थिइन् ।

सयौँ नेपाली गीतहरुमा स्वर दिएकी भोसलेले आफ्नो करियरमा १२ हजारभन्दा बढी गीतहरु गाइसकेकी छन् । ७ दशकभन्दा बढी लामो करिअरमा उनले विभिन्न भाषा र शैलीमा हजारौं गीत गाइन । उनका ‘दम मारो दम’, ‘पिया तू अब तो आजा’ र ‘चुरा लिया है तुमने’ जस्ता गीतहरू आज पनि सदाबहार छन् । तर उनको सङ्गीत यात्रा त्यति सजिलो भने थिएन ।

१६ वर्षको उमेरमा आशा भोसलेले परिवारको इच्छाविरुद्ध भागेर लता मंगेशकरका सेक्रेटरी गणपतराव भोसलेसँग विवाह गरेकी थिइन् । यस विवाहको लता र परिवारले कडा विरोध गरेका थिए, जसका कारण लामो समयसम्म उनीहरूबीच बोलचाल समेत बन्द भएको थियो । भोसलेले आफ्नो करियरमा धेरै अवार्डहरू प्राप्त गरेकी छन् । यसमा ७ वटा फिल्मफेयर अवार्ड समावेश छन्, जुन उनलाई उत्कृष्ट महिला पार्श्वगायिकाको रूपमा प्रदान गरिएको थियो । साथै, उनले एक लाइफटाइम अचीभमेन्ट अवार्ड पनि प्राप्त गरेकी छन् ।

त्यसैगरी, उनलाई सन् २००० मा दादासाहेब फाल्के अवार्ड र सन् २००८ मा पद्म विभूषण जस्ता प्रतिष्ठित सम्मानहरू पनि प्रदान गरिएको थियो। सन् २०१३ मा आशा भोसलेले मराठी चलचित्र ‘माई’ मा अभिनय समेत गरेकी थिइन् । भोसलेको नाममा दुबई र कुवेतमा सञ्चालनमा रहेका रेष्टुरेन्टहरू छन् । हिन्दी बाहेक उनले करिब २० वटा भारतीय तथा विदेशी भाषामा गीत गाएकी छन् । उनले गाएको ‘मोहनी लाग्ला है’, ‘पहाडको माथी माथी’, ‘किन बढ्दैछ ढुकढुकी’, ‘एउटा मान्छे मनपर्छ’, ‘म प्यार बेचिदिन्छु’, ‘तिम्रो मनमा लुकेको कुरा’, आदि जस्ता दर्जनौँ नेपाली गीतहरु सदाबहार छन ।