अखबार नेपाल ट्रेन्डिङ

काठमाडौं: विगत चार बर्षदेखि बन्द रहेको नेपाल-चीन जोड्ने पहिलो तातोपानी नाका आजबाट औपचारिक रुपमा सञ्चालन हुने भएको छ ।

२०७२ बैशाख १२ को भूकम्पले दुबै तर्फको भौतिक संरचनामा क्षति पुर्‍याएपछि बन्द भएको नाका आजबाट पुनः सञ्चालनमा ल्याउन लागिएको हो । भूकम्पले क्षति पुर्‍याएको तातोपानी क्षेत्रमा २०७३ साउनमा भोटेकोशी नदिले सडक लगायत संरचनामा थप क्षति पुर्‍याएपछि नाका सञ्चालनमा अन्यौलता थपिएको थियो ।

स्थानीय व्यवसायी, राजनीतिक दल, जनप्रतिनिधि एवम् नेपाल सरकारको लामो प्रयत्नपछि चिनियाँ पक्ष नाका पुनः सञ्चालनमा ल्याउन सहमत भएको हो । भूकम्पले मितेरी पुल समेतको क्षति पुर्याएपछि लार्चामा बन्दै गरेको सुख्खा बन्दरगाह निर्माणमा समेत समस्या परेको थियो । चीन सरकारको सहयोगमा २० करोड रुपैयाँको लागतमा सुविधासम्पन्न सुख्खा बन्दरगाहको निर्माण पनि हालै सम्पन्न भएको छ ।

भूकम्पपछि बन्दरगाहसँगै ६ किलोमिटर सडक र मितेरी पुलको चीन सरकारले पुर्ननिर्माण गरेको थियो । बाह्रबिसेदेखि लार्चासम्मको सडक सडक डिभिजन कार्यालय दोलखाले मर्मत गरेको हो । तातोपानी नाकाबाट पुन व्यवसाय सञ्चालन हुन लाग्दा व्यवसायीमा मात्र नभएर स्थानीयमा समेत खुसीयाली छाएको छ ।