अखबार नेपाल ट्रेन्डिङ

काठमाडौं:  नेपालका विभिन्न भूभागमा हावाहुरी, वर्षा र हिमपातको सम्भावना देखिएको छ। बंगालको खाडीमा रहेको न्यून–चापीय क्षेत्रमा  बनेको ‘यास’ नामक चक्रवातका कारण मंगलबारदेखि हावाहुरी, वर्षा र हिमपातको सम्भावना देखिएको हो ।

उक्त न्यून–चापीय क्षेत्र चक्रवातमा परिणत भएको र मंगलबारसम्म धेरै शक्तिशाली चक्रवातमा परिणत हुने हुँदा हावाहुरी, वर्षा र हिमपातको सम्भावना देखिएको जल तथा मौसम विज्ञान विभाग अन्तर्गतको मौसम पूर्वानुमान महाशाखाले प्रक्षेपण गरेको छ।

सो प्रणालीका कारण मंगलबार अपराह्नपछि देशका धेरै स्थानमा सामान्यदेखि पूर्ण बदली भई वाग्मती प्रदेश र प्रदेश नं १ का उच्च हिमाली-पहाडी भूभागका केही स्थानमा हल्कादेखि मध्यम हिमपात र वर्षाको सम्भावना रहेको महाशाखाले जनाएको छ ।

बंगालको खाँडीमा चक्रवात बन्न सुरू भइसकेको र नेपालको पूर्वी भागमा यसको प्रभाव मंगलबारदेखि हुन्छ भने पश्चिमी भागमा बिहीबारदेखि प्रभाव देखिने छ । उच्च हिमाली भूभागमा हावाहुरी, हिमपात र वर्षाको सम्भावना रहेकाले पर्वतारोहीलाई मौसमअनुसार सतर्कता अपनाई सुरक्षित रहन महाशाखाले अनुरोध गरेको छ।

प्रदेश नं १, प्रदेश नं २, वाग्मती, गण्डकी र लुम्बिनी प्रदेशका केही स्थानमा भारी वर्षा तथा बिहीबार कर्णाली र सुदूरपश्चिम प्रदेशका एक–दुई स्थानमा समेत भारी वर्षाको समेत सम्भावना रहेको छ । यो मौसममा नेपालका विभिन्न स्थानमा मेघगर्जन-चट्याङ-हावाहुरी र असिना–पानीको समेत सम्भावना रहेकाले आवश्यक सतर्कता अपनाउन महाशाखाले अनुरोध गरेको छ।

यो पनि पढ्नुहोस् :

१४६ सांसदले सर्वोच्चमै पुगेर गरे रिटमा हस्ताक्षर