अखबार नेपाल ट्रेन्डिङ

काठमाडौं: आज मातातिर्थ औंसी अर्थात आमाको मुख हेर्ने दिन । हरेक बर्ष वैशाख कृष्णपक्ष औंसीका दिन आफ्ना सन्तानले आमाको मुख हेर्ने दिनको रुपमा यो पर्व मनाउने गरिन्छ ।

ममताकी प्रतीक आमाको आशीर्वाद लिने र आमाप्रतिको सम्मान गर्ने दिनका रुपमा परापूर्वकालदेखि वैशाख कृष्णपक्ष औंशीका दिन यो पर्व मनाउने परम्परा रहीआएको छ । आजका दिन विशेषगरि छोराछोरीले आफ्नी आमालाई मिठा-मिठा खानेकुरासहित लत्ताकपडा लगायतका उपहारसहित जन्मदिने आमाप्रति सम्मान र कृतज्ञता व्यक्त गर्दै आशिर्वाद थाप्ने गर्दछन् ।

आमाले पनि आजका दिन छोराछोरीको दिर्घायु, सुस्वास्थ्य र असल जीवनको कामना गर्दै आशिष दिन्छिन् । साथै आमा नभएकाले भने आज काठमाण्डौंको पश्चिममा अवस्थित मातातीर्थ कुण्डमा पुगेर त्यहाँ स्नान गरि दिवंगत आमाको स्मरणमा तपर्ण र पिण्डदान गरि आमाको सम्झना गर्दछन् । मातातिर्थमा पुग्न नसक्नेहरुले अन्य देव तथा तीर्थस्थलमा आमाका नाममा सिदा दान गर्ने परम्परा रहिआएको छ ।

मातातिर्थकोबारेमा भने परापूर्व कालमा घना जंगलरहेको यस क्षेत्रमा गोठालाहरुले खाजा खाइरहेको समयमा एउटा गोठालाको रोटी उसको मुखमा नपरी कुण्ड भएतिर गएको र उक्त गोठालोले कुण्डमा आमाको दर्शन पाएको किंवदन्ती रहेको छ । यसरी आमाको दर्शन पाएसँगै घर र्फकने समयमा गोठालोले एक्लै फर्किन नमानेको र आमासँगै जाने इच्छा राखेपछि आफूहरुको मृत्यु भइसकेकोले हरेक वर्ष वैशाख औंसीको दिन यसै तीर्थमा आउनू भन्ने वाचासहित छोरालार्इ फर्काएको किंवदन्तीसमेत रहेको छ । आमाको पवित्रस्थल भएकाले यो ठाउँको नाम मातातीर्थ रहेको हो । यसरी विधिवत् रूपमा छोराछोरी आमालाई तिर्नुपर्ने ऋणबाट मुक्त हुन तथा आफ्नी आमाको मोक्ष प्राप्त गराउनको लागी मातातिर्थ औँसीको रुपमा मनाउने परम्परा रहेको मानिन्छ ।