अखबार नेपाल ट्रेन्डिङ

काठमाडौं: चन्द्रागिरी नगरपालिका-२ नागढुङगाबाट नियन्त्रित लागूऔषध ५ सय एम्पुल फेनारगन, ५ सय एम्पुल डाइजेपाम, ३ सय एम्पुल लुपिजेसिक र २ सय एम्पुल नुर्फिन सहित २ जनालाई प्रहरीले पक्राउ गरेको छ ।

पक्राउ पर्नेहरूमा पर्सा परवामैनपुर गाउँपालिका-४ बस्ने २४ वर्षीय तवरेज आलम दर्जी र सोही ठाउँ बस्ने २६ वर्षीय कैस मिया रहेका छन् । नागढुङ्गास्थित चेक पोष्टमा महानगरीय प्रहरी प्रभाग नागढुंगाबाट खटिएको प्रहरीले वीरगंजबाट काठमाडौं आउँदै गरेको ना.८ ख ५३४५ नम्बरको बस जाँच गर्ने क्रममा बसमा सवार उनीहरूलाई उक्त लागूऔषध सहित फेला पारी पक्राउ गरेको हो । साथै तवरेज आलम दर्जीको साथबाट प्रहरीले करिब ३ ग्राम अबैध लागूऔषध गाँजा र १ थान चिलिम समेत बरामद गरेको छ ।

मकवानपुर, हेटौंडा उपमहानगरपालिका-९ मास्टरचोकबाट नियन्त्रित लागूऔषध ४६ एम्पुल डाइजेपाम, ३४ एम्पुल नुर्फिन र ४२ एम्पुल फेनारगन सहित सोही ठाउँ बस्ने रमेश भन्ने ४१ वर्षीय एक्ला बहादुर आलेमगरलाई बुधबार बिहान प्रहरीले पक्राउ गरेको छ ।

ईलाका प्रहरी कार्यालय पशुपतिनगरबाट खटिएको प्रहरीले एक्ला बहादुरलाई उक्त लागूऔषध सहित फेला पारी पक्राउ गरेको हो ।

कास्की, पोखरा महानगरपालिका-१४ सुन्दर टोलबाट नियन्त्रित लागूऔषध २५ एम्पुल डाईजापाम, २३ एम्पुल फेनरागन र २२ एम्पुल नुर्फिन सहित सोही महानगरपालिका-१२ रानिपौवा बस्ने सन्तोष भन्ने २४ वर्षीय निर्मल नेपाली लगायत ४ जनालाई प्रहरीले पक्राउ गरेको छ ।

गोप्य सूचनाको आधारमा वडा प्रहरी कार्यालय रामबजारबाट खटिएको प्रहरीले उनीहरूलाई उक्त लागूऔषध सहित फेला पारी पक्राउ गरेको हो ।

भोजपुर, हतुवागडी गाउँपालिका-८ खुकोईलास्थित जङ्गलबाट करिब ६१ किलो अवैध लागूऔषध गाँजा प्रहरीले बरामद गरेको छ । ईलाका प्रहरी कार्यालय घोडेटारबाट खटिएको प्रहरीले सेतो प्लाष्टीकको बोरामा बेवारिसे अवस्थामा रहेको उक्त लागूऔषध फेला पारी बरामद गरेको हो ।