अखबार नेपाल ट्रेन्डिङ

काठमाडौं: सरकारको वार्षिक नीति तथा कार्यक्रम आज सङ्घीय संसदमा पेस हुँदैछ । सरकारका तर्फबाट राष्ट्रपति विद्यादेवी भण्डारीले नीति तथा कार्यक्रम पेस गर्नेछिन् । नीति तथा कार्यक्रम मन्त्रिपरिषद्को वैशाख १७ गतेको बैठकले अनुमोदन गरिसकेको छ ।

संघीय संसद्को संयुक्त बैठकमा अपराह्न ४ बजे नीति कार्यक्रम पेस हुनेछ । वर्तमान सरकार गठन भएपछि दोस्रो पटक नीति तथा कार्यक्रम पेस गर्न लागेको हो । अघिल्लो वर्ष सङ्घीय संरचना अनुसार पहिलो पटक नीति तथा कार्यक्रम पेस भएको थियो । सरकारले नीति तथा कार्यक्रमको सेरोफेरोमा रहेर आर्थिक वर्ष २०७६/०७७ को बजेट संसदमा पेस गर्नेछ ।

वैशाख २४ गते नीति तथा कार्यक्रममा प्रधानमन्त्रीले जवाफ दिनेगरी सङ्घीय संसद् सचिवालयले कार्यतालिका बनाएको छ । सोही दिन नीति तथा कार्यक्रम पारित गर्ने तयारी छ । नीति तथा कार्यक्रम पारित भएपछि मात्र प्रिबजेट पेस हुनेछ । नीति तथा कार्यक्रममा जवाफ दिएर प्रधानमन्त्री केपी शर्मा ओली भने भियतनाम भ्रमणमा जाने कार्यसूची छ । वैशाख २६ गतेदेखि जेठ १ गतेसम्म प्रधानमन्त्री भ्रमणमा रहनेछन् ।