अखबार नेपाल ट्रेन्डिङ

भक्तपुर : गत २१ गते भक्तपुरमा एउटा अनौठो घटना घट्यो । त्यहाँ जग्गा हेर्ने बहानामा एक जना बृद्धलाई निर्घाट कुटपिट भयो र उनको २२ गते उपचारको क्रममा मृत्यु भयो ।

घटनामा भक्तपुरको चाँगुनारायण नगरपालिका–८, सुडालका ६१ वर्षीय चन्द्रकुमार योञ्जनको ग्रिनसिटी अस्पतालमा उपचारको क्रममा मृत्यु भएको थियो । त्यसबेला घटनामा संलग्नहरुलाई प्रहरीले पक्राउ गरेको छ ।

भक्तपुरका एक व्यक्तिलाई जग्गा हेर्ने बहानामा लुटपाट गरी हत्या आरोपमा पक्राउ पर्नेमा सिन्धुपाल्चोकका ३७ वर्षीय कामी शेर्पा, २८ वर्षीय रमेश तामाङ र ३० वर्षीय प्रेम तामाङ छन् ।

अपराध महाशाखाको टोलीले पक्राउ गरेको र कामी शेर्पा मुख्य योजनाकार रहेको प्रहरीले जनाएको छ ।

गत बुधबार अपरान्ह करिब ४ बजेतिर घरमा आएका अज्ञात व्यक्तिहरुको अनुरोधपछि योञ्जन बिक्रीमा रहेको जग्गा देखाई दिन भन्दै डेढ किलोमिटरको दूरीमा रहेको क्षेत्रमा गएका थिए ।

जग्गा किन्ने बहाना बनाएर आएकाहरुले योञ्जनलाई कुटपिट गरी सिक्री लुटेर भागेका थिए । कुटपिटबाट स्थानीय व्यापारी समेत रहेका योञ्जन गम्भीर घाइते भएका थिए । पछि उपचारको क्रममा योन्जनको मृत्यु भएको थियो ।