अखबार नेपाल ट्रेन्डिङ

काठमाडौं: आईतवार बारा र पर्सामा ठूलो जनधनको क्षति हुने गरि आएको हावाहुरीको पूर्वानुमान गर्न नसकिएको मौसम पूर्वानुमान महाशाखाले जनाएको छ । मेघगर्जन सहित बर्ष हुने पूर्वानुमान गरे पनि उपकरण र प्रविधिको अभावमा हावाहुरीको पूर्वानुमान गर्न नसकिएको महाशाखाले स्पष्ट पारेको छ ।

अहिले प्रि मनसुनको सिजन भएकोले मौसम पूर्वानुमान महाशाखाले यो समयमा सामान्य हावाहुरी सहितको बर्षा र मेघगर्जन हुनुका साथै चट्याङ पर्नुलाई सामान्य रुपमा लिदै आएको र सोही अनुसार मौसम पूर्वानुमान गर्दै आएको महाशाखाले जनाएको छ ।

महाशाखाले प्रत्येक दिन आगामी तीन दिनसम्मको मौसमी अवस्थाको पूर्वानुमान गर्दै आएको छ । आईतबार पनि महाशाखाले तीन दिन सम्मको मौसमको अवस्थाको पूर्वानुमान गरेको थियो । महाशाखाले गरेको मौसमको पूर्वानुमान मध्य र पूर्वी नेपालका केही स्थानमा मेघगर्जन सहित पानी पर्ने प्रक्षपण गरेको थियो । तर धेरै स्थानमा महाशाखाले भने जस्तै मौसमी अवस्था रहेपनि बारा र पर्सामा भने अचानक ठूलो हावाहुरी आयो र ठूलो जनधनको क्षति भयो ।

यति ठूलोजनधनको क्षति हुने गरि हावाहुरीका बिषयमा महाशाखाको पूर्वानुमान गर्न नसकेको र भारतले नेपालसँग सिमा जोडिएका राज्यहरुमा ठूलो हावाहुरी आउने प्रक्षेपण गरेको अवस्थामा समेत उक्त सूचनालाई व्यवस्था गरेको आरोप समेत लागेको छ । तर महाशाखाले भने हावाहुरीको पूर्वानुमानका लागि आवश्यक उपकरण र मोडलको अभावमा आईतबारको मौसमी अवस्थाको आकलन गर्न नसकिएको दाबी गरेको छ ।

ठूलो हावाहुरी आएको बारा र पर्सामा हावाको गति कति थियो अहिले पनि महाशाखा भन्न सक्ने अवस्थामा नरहेको जनाएको छ । कति गतिमा हावाहुरी आएको हो भन्न आधिकारिक डाटा नभएपनि प्रति सेकेण्ड २० मिटर हावाको गति रहेको अनुमान गरेको छ ।

महाशाखाले अनुमान गर्न नसके पनि आखिर यति ठूलो हावाहुरी के कारणले आयो त भन्ने धेरैको चासो छ । वारा र पर्सामा यस्तो अवस्था आउनुमा वायुमण्डलको माथिल्लो भागमा न्यूनचापीय रेखा देखा परेको र तल्लो तहमा एक डेढ किलोमिटर सम्म बंगालको खाडीबाट आएको तातो हावाको सहयोगमा स्थानीय हावा बिकसित भएर एक्कासी ठूलो हुरी आएको हुन सक्ने अनुमान गरिएको छ ।