अखबार नेपाल ट्रेन्डिङ

काठमाडौं: समृद्ध नेपाल सुखी नेपाली दीर्घकालीन लक्ष्यका लागि लगानी सम्मेलन प्रस्थानविन्दु भएको भन्दै सरकारले सम्मेलनमा सहभागी विकास साझेदार एवम् लगानीकर्ता माझ लगानीमैत्री वातावरणका लागि कुनै पनि कसर बाँकी नराखिने प्रतिवद्धता जनाएको छ ।

सम्मेलन समापन समारोहमा सरकारको नेतृत्व गरिरहेको नेकपाका अध्यक्ष पुष्पकमल दाहालले राजनीतिक स्थायित्वसँगै नेपालको एकमात्र एजेण्डा अर्थिक समृद्धि रहेको भन्दै विकासका विभिन्न परियोजनामा आएको प्रतिवद्धताका लागि लगानीकर्ता तथा विकास साझेदारप्रति आभार व्यक्त गरेका छन् ।

अध्यक्ष दाहालले नीतिगत, कानुनी एवम् व्यावहारिक हिसाबले लगानीकर्तालाइ उचित वातावरण दिइने र लगानीको सुरक्षा दिइने प्रतिवद्धता उनले जनाए । सम्मेलनमा सहभागिता र लगानीको प्रतिवद्धताका लागि धन्यवाद दिंदै अर्थमन्त्री डाक्टर युवराज खतिवडाले नेपाल दक्षिण एशियामै उदाउँदो अर्थतन्त्रका रुपमा विकसित हुने क्रममा रहेको र यसमा मजबूत सहकार्य गर्न पुन: लगानीकर्ताको ध्यानाकर्षण गराए ।

लगानी सम्मेलन समापन समारोहमा गैरअवासीय नेपाली संघका अध्यक्ष भवन भट्ट, चौधरी समूहका अध्यक्ष विनोद चौधरी, स्काइ पावर ग्लोबलका सिइओ एड्लर केरीसहितले उर्बर भूमि नेपाल लगानीको प्रमुख गन्तव्य बन्ने विश्वास व्यक्त गरे । नेपाल लगानी बोर्डका प्रमुख कार्यकारी अधिकृत महाप्रसाद अधिकारीले सम्मेलनको उपलब्धि प्रस्तुत गरेका थिए ।

४० राष्ट्रका लगानीकर्ता तथा विकास साझेदारका प्रतिनिधि सम्मेलनमा सहभागी थिए । दुइ दिने सम्मेलनमा उर्जा, कृषि, पर्यटन, उद्योग, सञ्चार प्रविधिसहितका फरक फरक ७ सत्रमा छलफलपछि विभिन्न परियोजनामा लगानीको प्रतिवद्धता समेत जुटेको छ ।