अखबार नेपाल ट्रेन्डिङ

काठमाडौं: पत्रकारहरूको साझा संस्था नेपाल पत्रकार महासंघ स्थापनाको ६४औं वर्षमा प्रवेश गरेको छ । पत्रकारहरूको हकहितको लागि स्थापना भएको नेपाल पत्रकार महासंघले आफ्नो स्थापनाको ६३ वर्ष पुरा गरि आजबाट ६४ वर्षमा प्रवेश गरेको छ ।

स्थापना दिवसको अवसरमा विज्ञप्ति जारी गर्दै महासंघका अध्यक्ष गोविन्द आचार्यले महासंघको तर्फबाट आम नेपाली सञ्चारकर्मी तथा प्रेस तथा अभिव्यक्ति स्वतन्त्रताका पक्षधरहरूप्रति शुभकामना पनि व्यक्त गरेका छन् । नेपालमा लोकतन्त्र, नागरिक अधिकार, प्रेस तथा अभिव्यक्ति स्वतन्त्रता, पत्रकारिताको संस्थागत विकास र श्रमजीवी पत्रकारको हकहितका लागि महासंघ स्थापना भएको थियो । अहिले पनि सञ्चार र प्रेस स्वतन्त्रतामाथिको आक्रमण अझै कायम रहिरहेको छ ।

श्रमजीवी पत्रकारहरूका समस्या जिबितै रहेका बेला सञ्चार क्षेत्रले राज्यका सबै निकायका काम कारबाहीको निगरानी गर्नुका साथै सत्य-तथ्य सूचना प्रवाहका लागि नेपाल पत्रकार महासंघले भुमिका खेल्दै आएको छ । आफ्नो स्थापनाको दिवस पारेर नेपाल पत्रकार महासंघले देशैभर र विश्वका विभिन्न देशमा छरिएर रहेका महासंघका सदस्यसहित आम नेपाली सञ्चारकर्मीका साथै प्रेस तथा अभिव्यक्ति स्वतन्त्रताका पक्षधरहरूमा बधाई तथा शुभकामना व्यक्त गरेको छ ।

आज महासंघ केन्द्रीय समितिले सञ्चारग्रामस्थित केन्द्रीय कार्यालयमा दिउसो १२ बजे विशेष समारोहको आयोजना गरेको छ भने कार्यक्रममा महासंघका पूर्वउपसभापति, उपाध्यक्ष र महासचिव हरूलाई सम्मान गरिने पनि विज्ञप्ति मार्फत जानकारी दिएको छ ।