अखबार नेपाल ट्रेन्डिङ

एजेन्सी: पोर्चुगलमा रहेका आप्रवासीहरुको लागि आवास भिसा पोर्चुगल सरकारद्वारा सहज बनाईएको राष्ट्रपति मार्सेलो रिबेलो दि सौजाले घोषणा गरेका छन् । आप्रवासी कानुनमा भएको सो हेरफर र सहजता राष्ट्रपतिको अफिसियल पेजमार्फत जानकारी दिईएको हो ।

नयाँ कानुन अनुसार गैर कानुनी तरिकाले पोर्चुगल छिरेका वा बसोबास गरिरहेका तर कम्तिमा पनि १२ महिनाको सामाजिक सुरक्षा कर (Social Security Tax) तिरेकाहरुको लागि आवस भिसा सहज बनाईएको छ । संविधान सभाको २२ फेब्रुअरीमा बसेको बैठकले पोर्तुगलको राष्ट्रिय भूमिमा प्रवेश गर्ने, बसोबास गर्ने, पोर्तुगल छोड्ने र आप्रवासीहरुलाई देश निकाला गर्ने कानुनको हकमा यहाँको PSD र CDS-PP राजनीतिक पार्टीको बिरुद्धमा PS, PCP, BE र PAN पार्टीका सांसदहरुले दिएको भोटको आधारमा अनुमोदन गरिएको थियो ।

राष्ट्रपतिद्वारा घोषणा गरिएको नयाँ कानुनले बिना भिसा वा गैर कानुनी तरिकाले पोर्तुगल प्रवेश गरका र यहाँ बसोबास गरिरहेका आप्रवासी भएतापनि कम्तीमा १२ महिनाको सामाजिक सुरक्षा कर (Social Security Tax) तिरेका आप्रवासीहरुलाई कानूनी रूपमा देशमा प्रवेश गरेको मान्यता दिएको छ ।

पोर्चुगलको आप्रवासी कानुनमा भएको यो परिवर्तनले आप्रवासी कानुन नीति २००७ लाई खारेजी गरेको छ , जसमा पोर्तुगलको भूभागमा भिसा लिएर कानुनी रुपमा प्रवेश गरेका (Legal Entry with Visa) लाई मात्रै आप्रवासी आवास अनुमति दिने उल्लेख गरिएको थियो ।

राष्ट्रपतिद्वारा घोषणा गरिएको नयाँ कानुन अनुसार आप्रवासी नितिको आर्टिकल १२३ को खारेजी हुनेछ भने सम्पूर्ण आप्रवासीहरुको आवास अनुमतिपत्र आर्टिकल ८८ अन्तर्गत प्रदान गरिनेछ ।