अखबार नेपाल ट्रेन्डिङ

रामेछाप: उत्कृष्ट आदिवासी जनजाति पत्रकारीता बर्ष पुरस्कारका लागि रामेछापमा अग्रज पत्रकार सुमित श्रेष्ठले अक्षय कोष स्थापना गर्न ५० हजार सहयोगको घोषणा गरेका छन्  ।

नेपाल आदीवासी जनजाति पत्रकार महासंघ रामेछापका पूर्व अध्यक्ष श्रेष्ठले अक्षयकोषबाट आउने व्याजबाट हरेक बर्ष जिल्लामा रहि उत्कृष्ट पत्रकारीता गर्ने आदिवासी जनजाति पत्रकारलाई पुरस्कृत गर्ने उदेश्यले कोषको स्थापनाकालागि सहयोग गरेको बताए  ।

नेपाल आदिवासी जनजाति पत्रकार महासंघको २१ औं स्थापना दिवशको अवसरमा अक्षयकोष स्थापनाको घोषणा गरिएको हो । महासंघले हरेक बर्ष ५ हजार नगदतथा दोसल्ला र प्रमाणपत्र सहित उत्कृत जनजाति पत्रकारलाई सम्मान तथा पुरस्कृत गर्दै आएको छ ।

यस बर्ष पनि आफ्नो स्थापना दिवशका अवसरमा मंगलबार चियापान कार्यक्रमको आयोजना गरि महासंघका पूर्व अध्यक्ष एवं क्रियाशिल पत्रकार यूनिक बिफा घिसिङ्गलाई पुरस्कृत गरेको छ । रामेछाप नगरपालिकामा आयोजना गरिएको कार्यक्रममा उक्त नगरपालिकाका प्रमुख नरबहादुर थापा मगरले घिसिङ्गलाई ५ हजार नगद तथा प्रमाणपत्र सहित दोसल्ला ओडाएर सम्मान गर्नु भएको हो  ।

नेपाल आदिवासी जनजाति पत्रकार महासंघ रामेछापका अध्यक्ष नबराज श्रेष्ठको अध्यक्षतामा सम्पन्न कार्यक्रममा रामेछाप नगरपालिकाका प्रमुख नरबहादुर थापामगर, उपप्रमुख श्रृजना खड्का, नेपाल आदिबासी जनजाति पत्रकार महासंघका बाग्मती प्रदेश उपाध्यक्ष युवराज श्रेष्ठ, नेपाल पत्रकार महासंघ बाग्मती प्रदेशका सदस्य बद्रि नयाँघरे, नेपाल पत्रकार महासंघ रामेछापका अध्यक्ष रमेश ढुंगेल लगायतका बक्ताहरुले शुभकामना मन्तव्य राख्नु भएको थियो ।