अखबार नेपाल ट्रेन्डिङ

काठमाडौं: कोरोनाभाइरस विरुद्ध अहिले ७० किसिमका खोप विकसित भइसकेका छन् । यीमध्ये तीन किसिमका खोपहरु परीक्षणको चरणमा गइसकेको विश्व स्वास्थ्य संगठनले जनाएको छ । यसरी परीक्षणका चरणमा पुगिसकेका मध्ये चीनमा विकसित भइरहेको खोपले परीक्षणको सबैभन्दा धेरै चरण पार गरिसकेको छ ।

विश्व स्वास्थ्य संगठनका अनुसार बेइजिङ इन्स्टिच्युट अफ बायोटेक्नोलोजी र हङकङको क्यानसिनो बायोलोजिक्सले विकास गरेको खोप परीक्षणको दोस्रो चरणमा पुगिसकेको छ । अमेरिकी औषधि उत्पादक कम्पनी इनोभिओ र मोडेर्नाले विकास गरेका अरू दुई खोप पनि अहिले मानवमा परीक्षण गर्ने क्रममा रहेको डब्ल्यूएचओले जानकारी दिएको छ ।

कुनैपनि खोप प्रमाणित भई प्रयोगमा आउन १० देखि १५ महिनासम्म लाग्छ । तर कोरोना भाइरसविरुद्धको खोप भने द्रुत गतिमा विकास भइरहेको अन्तर्राष्ट्रिय सञ्चारमाध्यमले उल्लेख गरेका छन् । यो खोप आगामी वर्षसम्ममा आम प्रयोगमा आउने अपेक्षा गरिएको छ । अक्सफोर्ड विश्वविद्यालयकी भ्याक्सिनोलोजी प्रोफेसर सारा गिल्बर्टले आफ्नो समूहले बनाइरहेको खोप यही वर्षको अन्त्यसम्म आम प्रयोगमा आउने दाबी गरेकी छन् । अक्सफोर्डको टिमले यसअघि मर्स भाइरसका लागि विकास गरेको खोपलाई कोरोनाभाइरसविरुद्ध लड्न सक्ने गरी रुपान्तरण गरिरहेको छ ।