अखबार नेपाल ट्रेन्डिङ

काठमाडौं : पेप्सीकोला टाउन प्लानिङस्थित सनसिटी अपार्टमेन्टमा बस्दै आएका सबैजनाको कोरोना परीक्षण गरिने भएको छ । अपार्टमेन्टको १५औँ तलामा बस्ने एकै परिवारका तीनमध्ये दुईमा कोरोना पुष्टि भएपछि स्वास्थ्य तथा जनसंख्या मन्त्रालयले यस्तो तयारी थालेको हो ।

गत चैत ५ गते बेलायतको लण्डनबाट आएर अपार्टमेन्टमा बसोबास गर्ने एकै परिवारका तीनजना कोरोना भाइरसको शंकास्प दमध्ये २ जनाको पुष्टि भइसकेको छ । सोमबार आरडीटी विधिबाट परीक्षण गर्दा तीनमध्ये ५८ वर्षीय पुरुष, ८१ वर्षीया महिलामा कोरोना पोजेटिभ देखिएको हो । त्यसपछि उनीहरुलाई पाटन अस्पतालको आइसोलेसनमा लगेर पीसीआरबाट थप परीक्षण गर्दा समेत पोजेटिभ रिपोर्ट देखिएको हो ।

अन्य एक जनाको पहिलो परीक्षणमा पोजेटिभ नदेखिएको स्वास्थ्य मन्त्रालयले जनाएको छ । मन्त्रालयका अनुसार उनीहरू लण्डनबाट फर्किएपछि क्‍वारेन्टाइनमा बस्दै आएका थिए । मन्त्रालयले उक्त अपार्टमेन्टमा बस्‍ने करिब ३ सय परिवारका सबैको परीक्षण आजैबाट सुरू गरिएको जनाएको छ । कोरोना पुष्टि भएपछि सनसिटी अपार्टेमन्टलाई प्रहरीले सिल गरिसकेको छ ।