अखबार नेपाल ट्रेन्डिङ

काठमाडौं: सरकारले जेठ १३ गतेदेखि काठमाडौँ जिल्लासहित देशभरिका बालबालिकाका लागि पोलियो रोगविरुद्धको खोप ‘आइपिभि’ अभियान सञ्चालन गर्दैछ । यसअघि खोप लगाउन छुटेका देशभरिका १४ लाख ६२ हजार सात सय १२ जना बालबालिकालाई उक्त खोप लगाउने उद्देश्यसहित अभियान सञ्चालन गर्न लागेको हो ।

जनस्वास्थ्य कार्यालय, काठमाडौँले आयोजना गरेको पत्रकार सम्मेलन कार्यक्रममा अभियानका क्रममा काठमाडौँ जिल्लाका एक लाख २५ हजार ११७ बालबालिकालाई खोप लगाइनेछ । काठमाडौँमा १ हजार ४२१ विद्यालयका अतिरिक्त ७८३ खोप केन्द्र स्थापना गरी खोप प्रदान गरिने र अभियानका लागि २७८ स्वास्थ्यकर्मी र ५५६ स्वयम्सेविका  परिचालन गरिने पत्रकार सम्मेलनमा बताईएको छ ।

नेपालमा सन् २०१० देखि नै पोलियो रोग नदेखिए पनि छिमेकीमुलुक पाकिस्तान र अफगानिस्तानमा पोलियो रोगको सङ्क्रमण देखिएकाले खोप अभियान सञ्चालन गर्नुपरेको जनस्वास्थ्य कार्यालयको भनाइ छ । विसं २०७३ वैशाखदेखि २०७५ असोजसम्म जन्मिएका बालबालिकालाई खोप लगाइने छ । विश्वबजारमा ‘आइपिभि’ खोपको अभाव रहेकाले बालबालिकालाई खोप लगाउन नपाइएकाले यो खोप प्रदान गर्न थालिएको हो । खोप अभियान सञ्चालनका लागि स्वास्थ्यकर्मीलाई अभिमुखीकरण तालिम समेत दिइएको छ । यही जेठ २६ गतेसम्म हुने खोप अभियानमा स्थानीय तहसँग पनि समन्वय गरिनेछ ।