काठमाडौं: कोभिड-१९ बाट संक्रमितहरु खुलेआम हिँडिरहेकाले संक्रमण अझै फैलिने सक्ने भन्दै स्वास्थ्य तथा जनसंख्या मन्त्रालयले चेतावनी दिएको छ ।

संक्रमण उच्च रहेका जिल्लाहरुमा नै संक्रमितहरु खुलेआम सार्वजनिक स्थानहरुमा हिँडिरहेका र निषेधाज्ञाको पलाना पूर्ण रुपमा नभएकाले  कोरोना भाइरसको संक्रमण अझै फैलिन सक्ने मन्त्रालयले बताएको छ ।

जनस्वास्थ्यका मापदण्डहरुको राम्ररी पालना नभइरहेको र निषेधाज्ञाको समयमा पनि मानिसहरुको आवत जावतमा ५९ प्रतिशत मात्रै कमी आएको देखिएको मन्त्रालयले जानकारी दिएको छ ।

काठमाडौं, रुपन्देही, ललितपुर, भक्तपुर, मोरङ, कैलाली, कास्की, बाँके, दाङ, चितवन, सुर्खेत, झापा, कञ्चनपुर, मकवानपुर, धनुषा, काभ्रे, सुनसरी, पर्सा, बर्दिया, पाल्पा जिल्लामा संक्रमण उच्च रहेको तथा संक्रमित व्यक्तिहरु सार्वजनिक स्थानहरुमा खुलेआम हिडिँरहेको देखिएको पनि मन्त्रालयले जानकारी दिएको छ ।

मन्त्रालयका सह–प्रवक्ता डा समिरकुमार अधिकारीले सोमबार एक विज्ञप्ती जारी गर्दै कोरोनाविरुद्धको युद्ध स्वास्थ्य तथा जनसंख्या मन्त्रालय एक्लैको युद्ध नभएकाले यसका लागि अन्य मन्त्रालयहरु, प्रदेश र स्थानीय तहसहित सबै सरकारी निकायहरुको पनि उत्तिकै महत्वपूर्ण भूमिका रहने बताएका छन् ।