अखबार नेपाल ट्रेन्डिङ

काठमाडौं: नेपालमा नयाँ भेरियन्ट कोरोना भाइरसको दोस्रो लहरमा युवाहरु बढी संक्रमित भइरहेको पाईएको छ ।

अहिले दैनिकजसो संक्रमितमा २०-३९ वर्ष उमेर समूहका धेरै रहेका छन् । उक्त समूहको तुलनामा ६० वर्षभन्दा माथि उमेर समूहका संक्रमित संख्या न्यून पाईएको छ ।

स्वास्थ्य तथा जनसंख्या मन्त्रालयको तथ्यांक अनुसार पछिल्ला १० दिन (वैशाख २३ देखि जेठ १)भित्र नेपालभर संक्रमित भएकामध्ये सबैभन्दा धेरै २०-३९ वर्ष उमेर समूहका छन् ।

उक्त अवधिमा उक्त उमेर समूहका ४० हजार ८ सय १० जना संक्रमित भएको तथ्यांक छ ।

सोही अवधिमा ६० वर्ष वा त्योभन्दा बढी उमेर समूहका संक्रमित संख्या जम्मा १० हजार १ सय २८ रहेको छ ।

यो तथ्यांक अनुसार १० दिनमा ६० वर्ष वा त्योभन्दा बढी उमेर समूहका भन्दा २०-३९ वर्ष उमेर समूहका ३० हजार ६ सय ८२ जना बढी संक्रमित भएका छन् ।

युवा उमेर समूहमा पनि ३०-३९ वर्षभित्रका संक्रमित बढी रहेका छन् । उक्त उमेर समूहका २१ हजार १ सय १३ जना संक्रमित भएका छन् ।

यस्तै २० देखि २९ उमेर समूहका १९ हजार ६ सय ९७ जना संक्रमित भएका छन् ।

उक्त तथ्यांकले कोरोनाको दोस्रो लहरले युवा उमेरकालाई बढी संक्रमित बनाएको देखाउँछ । चिकित्सकहरुले पनि कोरोनाको नयाँ भेरियन्टले युवा पुस्तामा बढी आक्रमण गरिरहेको बताउँदै आएका छन्, जुन तथ्यांकबाट समेत पुष्टि भएको छ ।

नेपालमा कोरोना संक्रमणबाट ४ हजार ८ सय ५६ जनाको मृत्यु भएको छ । यसरी मृत्यु भएकामध्ये आधाभन्दा बढी ६० वर्ष वा त्यो भन्दा माथि उमेर समूहका छन् ।

स्वास्थ्य मन्त्रालयको तथ्यांक अनुसार नेपालमा ६० वर्ष वा त्यो भन्दा माथि उमेर समूहका २ हजार ७ सय ३५ जनाको मृत्यु भएको छ ।

यसैगरी, ५०-५९ वर्ष उमेर समूहका ८ सय ८१ जना र ४०-३९ वर्षका ६ सय ५९ जनाको मृत्यु भएको छ ।

२० देखि ३९ वर्ष उमेर समूहका ५ सय २३ जनाको मृत्यु भएको तथ्यांक छ । यसमा ३०-३९ वर्षका ३ सय ८५ र २०-२९ वर्ष उमेर समूहका १ सय ३८ जना रहेका छन् ।

यस्तै ०-९ वर्षका बालबालिका २९ जना र १०-१९ वर्षका २९ जनाको कोरोना संक्रमणबाट मृत्यु भएको तथ्यांक छ ।