अखबार नेपाल ट्रेन्डिङ

काठमाडौं : काठमाडौं महानगरपालिकाले कोरोना भाइरस नियन्त्रण र रोकथामकालागि कीटाणुनाशक (डिसइन्फेक्टेन्ट) छर्किन थालेको छ ।

कोरोना भाइरसको संक्रमण फैलिन नदिन संक्रमण देखिएका र जोखिमयुक्त क्षेत्रसँगै सार्वजनिक स्थानहरुमा डिसइन्फेक्टेन्ट गर्ने कार्यलाई निरन्तरता दिएको महानगरले जनाएको छ ।

महानगरले मुख्य गरेर कालीमाटी, बल्खु लगायतका बढी भिडभाड हुने तरकारी बजार, महानगरीय ट्राफिक प्रहरी महाशाखा, अस्पताल क्षेत्र र कोरोना संक्रमित भेटिएका ठाउँलाई प्राथमिकतामा राखेर निसंक्रमण गर्ने कार्यलाई निरन्तरता दिएको छ ।

महानगरले ३२ वटै वडामा डिसइन्फेक्टेन्ट गर्न दैनिक १० वटासम्म सवारी र उपकरणका साथै दैनिक ५ वटा टोलीले सो सम्बन्धी जनचेतना मुलक सन्देश सम्प्रेषणका लागि परिचालन गरेको मेयर विद्यासुन्दर शाक्यले जानकारी दिए।

कोरोना भाइरसको संक्रमण न्युनिकरणका साथै गर्मी मौसममा डेंगुको प्रकोप पनि बढ्ने भएकाले त्यसको नियन्त्रणका लागि समेत प्रभावकारी हुने हुँदा डिसइन्फेक्टेन्ट गर्ने कार्यलाई निरन्तरता दिएको उनको भनाई छ।

उनले निसंक्रमण गर्ने प्रचलित मापदण्ड बमोजिमको रसायन प्रयोग गरि यसलाई कोरोना भाइरसको संक्रमण निस्तेज नहुञ्जेल जारी राख्ने बताउनु भयो ।