अखबार नेपाल ट्रेन्डिङ

एजेन्सी: अफगानिस्तानको पुर्वी शहर जलालवादमा गराइएको आत्मघाती बम विस्फोटमा कम्तिमा १६ जनाको मृत्यु भएको छ ।

जलालाबाद शहरमा रहेको विमानस्थल नजिकैको निर्माणधीन कम्पनीलाई लक्षित गरी भएको आक्रमणमा अन्य १० जना घाईते भएका छन् । निर्माणाधीन कम्पनीमा दुई आत्मघाती बम आक्रमणकारीले हमला गरेको बताइएको छ । आत्मघाती बम आक्रमणपछि अफगान सुरक्षा बल तथा बन्दुकधारी लडाकुबीच गोली हानाहान समेत भएको जनाइएको छ ।

आक्रमणमा मारिनेमा अधिकांश निर्माणाधीन कम्पनीमा काम गर्ने मजदुर छन् । सुरक्षा बलको जवाफी कारवाहीमा सबै आक्रमणकारी मारिएकाले हाल त्यस क्षेत्रको अवस्था शान्ति रहेको अफगान सञ्चारमाध्यमले जनाएका छन् । आक्रमणको जिम्मा हालसम्म कसैले लिएको छैन ।

जारी १८ वर्ष लामो युद्ध अन्त्य गर्ने उद्धेश्यले अमेरिका र तालिबानबीच कतारमा शान्ति वार्ता भइरहेको बेला पनि तालिवानले सुरक्षाकर्मी लक्षित आक्रमण रोकेको छैन । वार्ता प्रगति उन्मूख रहेको अमेरिकी विदेशमन्त्रालयले जनाएको छ । गत साता हेलमन्द प्रान्तमा तालिबानले गरेको आक्रमणमा २३ सुरक्षाकर्मी मारिएका थिए ।