अखबार नेपाल ट्रेन्डिङ

एजेन्सी: अमेरिकाको टेक्सासस्थित एक चर्चमा प्रार्थना भइरहेको समयमा बन्दुकधारीले अन्धाधुन्ध गोली चलाउँदा दुई जनाको मृत्यु भएको छ । सामाजिक सञ्जालमा समेत लाइभ भइरहेको प्रार्थनाका क्रममा एक जना बन्दुकधारी उभिएर अन्धाधुन्ध गोली चलाएका हुन् । टेक्सासको फोर्ट वार्थ नजिकैको ह्वाइट सेटलमेन्टमा रहेको वेस्ट फ्रीवे चर्च अफ क्रिष्टमा सो घटना भएको हो ।

चर्चमा करिब २ सय ८० जना मानिसहरु प्रार्थना गरिरहेका बेला सो गोलीकाण्डमा जनधनको क्षतिबारे अहिलेसम्म एकीन जानकारी सार्वजनिक भइसकेको छैन । अमेरिकी सञ्चारमाध्यमहरुका अनुसार गोली चलाउन थालेको ६ सेकेण्डभित्रै चर्चका सुरक्षागार्डहरुले आक्रमणकारीमाथि गोली चलाएका थिए । बन्दुकधारीलाई गोली हानेर मारिदिने चर्चका सुरक्षाकर्मीहरुको प्रशंसा गरिएको छ । आक्रमणको कारण वा उद्देश्य के थियो भन्नेबारे अनुसन्धान भइरहेको स्थानीय प्रहरीले जनाएको छ ।