अखबार नेपाल ट्रेन्डिङ

एजेन्सी: भारतको लोकसभा र राज्यसभाबाट ‘विवादित’ नागरिकता संशोधन विधेयक २०१९ पारित भएसँगै भारतको पूर्वोत्तर राज्य असममा हिंसात्मक प्रदर्शन बढ्दै गएको छ । नागरिकता संशोधन विधेयकलाई लिएर असमलगायत पूर्वोत्तर राज्यमा प्रदर्शन चर्किएपछि पश्चिम बंगालमा पनि विरोध सुरु भएको छ ।

बंगालको मुर्शिदाबादमा प्रदर्शनकारीहरुले लालगोला रेलवे स्टेशनमा पाँच वटा खाली ट्रेनमा आगो लगाएका छन् । प्रदर्शनकारीहरुले राज्यका विभिन्न क्षेत्रका सडक पनि अवरुद्ध गरेका छन् । जसका कारण सडक यातायात र रेल सेवा पनि प्रभावित बनेको छ । मुर्शिदाबाद र उत्तरी २४ परगना जिल्ला तथ हावडा (ग्रामीण) मा प्रदर्शनले उग्र रुप लिएको प्रहरी अधिकारीले जनाएका छन् । हावडा जिल्लाको एक रेलवे स्टेशन परिसरको भाग शनिबार प्रदर्शनकारीहरुले जलाएको र त्यहाँ तैनाथ सुरक्षाकर्मीहरुलाई हातपात गरेका छन् ।

प्रहरीका अनुसार शनिबार बिहानदेखि नै नागरिकता संशोधन विधेयकको विरोध गरिरहेका हजारौँ प्रदर्शनकारीहरुले सडक अवरुद्ध गर्नुका साथै केही पसलमा पनि आगो लगाएका छन् । प्रदर्शन चर्किएपछि ४० भन्दा बढी रेलवे सेवा रद्द गरिएको प्रहरी अधिकारीहरुले जनाएका छन् । रेलवेका कर्मचारीहरु ज्यान बचाउन स्टेशन छोडेर भागेका थिए । प्रदर्शनकारीहरुले सार्वजनिक बस, दमकलामा पनि आगो लगाएका छन् ।