अखबार नेपाल ट्रेन्डिङ

एजेन्सी: पाकिस्तानी सेनाको एउटा सानो विमान रावलपिन्डीनजिकै एउटा आवासीय क्षेत्रमा दुर्घटनाग्रस्त हुँदा कम्तीमा १५ जनाको मृत्यु भएको उद्धारमा संलग्न अधिकारीहरूले बताएका छन् ।

दुर्घटनामा हताहत हुनेमा चालकदलका पाँच सदस्य र १० सर्वसाधारण मानिस रहेको बताइएको छ । अरू १२ जना घाइते भएका छन् । उक्त विमान तालिमका लागि उडाइएको जनाईएको छ । दुर्घटनामा परेपछि आगो लागेर केही घरहरूमा पनि आगो फैलिएको थियो ।

राजधानी इस्लामाबादनजिकै रहेको रावलपिन्डीमा पाकिस्तानी सेनाको मुख्यालय छ । शोकाकुल र स्तब्ध स्थानीय मानिसहरू दुर्घटना भएको क्षेत्रमा भेला भएको समाचारसंस्था एएफपीले जनाएको छ । त्यहाँबाट प्राप्त तस्बिरमा धुँवाले कालो भएका भवनहरूको भग्नावशेष देखिन्छ ।

सन् २०१० मा एउटा निजी विमान कम्पनीले सञ्चालन गरेको विमान इस्लामाबाद नजिकै दुर्घटनाग्रस्त हुँदा १ सय ५२ जनाको मृत्यु भएको थियो । त्यो नै पाकिस्तानमा भएको सबैभन्दा डरलाग्दो विमान दुर्घटना थियो ।