अखबार नेपाल ट्रेन्डिङ

एजेन्सी: विश्वव्यापी तापमान वृद्धिले मानवजातीले भयंकर ठूलो संकटको सामना गर्नुपर्ने संयुक्त राष्ट्र संघले चेतावनी दिएको छ ।

जलबायु परिवर्तनका सम्बन्धमा संयुक्त राष्ट्र संघको अन्तरसरकारी अध्ययन समितिले गरेको अध्ययनले विश्वव्यापी तापमान वृद्धिमा मानवजाति नै जिम्मेवार रहेको समेत ठहर गरेको छ ।

झण्डै १४ हजार वैज्ञानिक अध्ययनलाई आधार बनाएर तयार गरिएको प्रतिवेदनमा सन् २०३० सम्ममा पृथ्वीको तापमान १ दशमलव ५ डिग्री सेन्टिग्रेडले बढ्ने चेतावनी दिएको छ ।

बढ्दो तापमानका कारण विश्वभरमा मौसमसँग जोडिएका विपद्ले गम्भीर आपतका घटनाहरु सामने आउने प्रतिवेदनमा उल्लेख छ ।

वायुमण्डललाई तताउने ग्यासको उत्सर्जन जुन रुपले भइरहेको छ त्यसले गर्दा अबको दुई दशकमै तापमानले सीमा नाघ्ने वैज्ञानिकहरुको निष्कर्ष छ ।

यो शताब्दीको अन्त्यसम्ममा समुन्द्रको जलस्तर लगभग दुई मिटर बढ्ने प्रतिवेदनमा औंल्याइएको छ । मावनजातिले भोग्नु पर्ने संकटसँगै वैज्ञानिकहरुले कार्बन उत्सर्जनमा ब्यापक कटौती गर्नसके तापमानलाई स्थिर गर्न सक्ने आशा पनि औंल्याएका छन् ।

४२ पानाको प्रतिवेदन नीति–निर्माताहरुका लागि मार्गदर्शक साराशंको रुपमा पनि लिइएको छ । यसलाई आगामी महिनामा आउने सिलसिलेवार कयौं प्रतिवेदनको एक कडीमा रुपमा लिँदै ग्लासगोमा हुन गइरहेको जलवायु सम्मेलनको लागि पनि अर्थपूर्ण हुने बताइएको छ ।

अनुसन्धानमूलक केही दस्तबेजहरुले मानवजातीको असावधानीपूर्ण क्रियाकलापले पर्यावरणमा पुर्याएको क्षतिलाई हजारौं वर्षमा पनि भरपाइ गर्न नसकिने उल्लेख गरिएको छ ।