अखबार नेपाल ट्रेन्डिङ

अफ्रिकी मुलुक मोजाम्बिकमा ‘इडाई’ नामक खतरनाक समुद्री आँधीका कारण मृत्यु हुनेको संख्या एक हजार नाघेको छ ।

राष्ट्रपति फिलिपे नुसीले मृतकको संख्या एक हजार नाघेको हुन सक्ने बताए पनि यकिन तथ्यांक आउन सकेको छैन । प्रतिघण्टा एक सय ७७ किलोमिटरको वेगमा आएको आँधीले बन्दरगाह शहर बेयरामा सबैभन्दा धेरै क्षति पुर्याएको छ । गत बिहीबारदेखि मुसलधारे वर्षासहितको आँधीले क्षति पुर्याए पनि सो शहरमा आइतबाबाट उद्दारकर्मी पुगेका छन् । त्यसपछि मात्रै सो आँधीले मच्चाएको विध्वसंको विवरण बाहिर आएको हो । बेयराको निरीक्षणमा गएका राष्ट्रपति नुसीले आँधीले ठूलै विध्वस गरेको बताएका छन् ।

झण्डै पाँच लाख मानिसको बसोवास गर्दै आएको बेयरा शहर ९० प्रतिशत ध्वस्त भएको बताइएको छ । बेयरामा आँधीले क्षति नपुर्याएको घर भेट्न मुस्किल परेको उद्दारकर्मीहरुले जनाएका छन् । उद्दारकर्ताहरूले शहरबाहिर झनै विकराल समस्या भएको हुनसक्ने बताएका छन् । धेरै ठाउँमा बिजुली र सञ्चार सम्पर्क टुटेको छ । सडकहरू सहित धेरै ठाउँमा जमिन भासिएका छन् जसका कारण राहत कार्य झन चुनौतीपूर्ण हुने बताइएको छ ।