अखबार नेपाल ट्रेन्डिङ

काठमाडौं: दुई नेपाली चलचित्र ‘छक्कापञ्जा ४’ र ‘छड्के २’ एकैदिन रिलिज हुँदैछन् । फरक धारमा यी दुई चलचित्रमध्ये कसले बाजी मार्ला भन्ने चासो र चर्चा सिने बजारमा व्याप्त छ ।

‘छक्का पञ्जा ४’ कलाकार जोडी दीपकराज गिरी र दीपाश्री निरौलाको समूहले निर्माण गरेको चलचित्र हो । यो समूहको अहिले ‘६ एकान ६’ देखि छक्कापञ्जाका ३ वटा सिक्वेल सबै सुपरहिट भएका छन् ।

चलचित्र ‘छड्के २’ चाहि ८ वर्षअघि प्रदर्शनमा आएको ‘छड्के’ को सिक्वेल हो । सौगात मल्ल, दयाहाङ राई, विपीन कार्कीहरूको अभिनय रहेको छड्के व्यपारिक रूपमा भने सफल भएको थिएन । यद्यपि, फरक खालका चलचित्रमा रमाउने ‘क्वालिटी’ दर्शकहरूले चलचित्रलाई रूचाएका थिए ।

हिट चलचित्रको सिक्वेल नभएकाले ‘छड्के २’ को व्यापारिक सफलता सुपरस्टार नायक अनमोल केसीमा अत्यधिक निर्भर छ । अनमोलले अभिनय गरेका अधिकांश चलचित्र सफल छन् । उनी थोरै चलचित्र खेल्ने, तर मिहिनेती नायक हुन् । अनमोलको युवापुस्तामा धेरै फ्यान फलोइङ भएकाले उनका चलचित्रले उच्च व्यापार गर्ने पक्काजस्तै हुन्छ ।

‘छक्कापञ्जा ४’ र ‘छड्के २’ एकै दिन रिलिज हुनु चाहि दुर्भाग्यपूर्ण मान्छन् नेपाली चलचित्रका शुभेच्छुकहरूले दुवैले एक अर्कासँग इगो राखेर वा धेरै आत्मविश्वास देखाएर चलचित्र जुधाएको आरोप छ ।

‘छड्के २’ले पहिला फागुन १९ गते रिलिज डेट तय गरेको थियो र पछि छक्कापञ्जाले पनि यही मिति घोषणा गरेको हो । छक्का पञ्जा आएपछि छड्केले मिति सार्ने दीपकराज गिरीको आशा थियो, तर त्यस्तो भएन । अनमोल केसी विगतमा बिग बजेटको दक्षिण भारतीय चलचित्रसँग समेत भिड्न नडराएको नजिर छ । उनले अभिनय गरेको ‘ए मेरो हजुर ३’ बहुचर्चित दक्षिण भारतीय फिल्मसँग जुध्नुपरेको थियो । यसका बाबजुद चलचित्रले नाफाको व्यापार गरेको थियो ।

यद्यपि यसपालि अनमोललाई बढी रिस्क छ । उनले आफ्नो कम्फर्ट जोनभन्दा बाहिर गएर ग्याङ लिडरको भूमिका निभाएका छन् । लभरव्वाईका रूपमा बढी रूचाइएका अनमोललाई ग्याङस्टर अवतारमा दर्शकले कत्तिको रूचाउने हुन् यसै भन्न सकिन्न । यद्यपि उम्दा निर्देशक निगम श्रेष्ठले अनमोलको अभिनयमा धेरै निखार ल्याएको आशा राख्न सकिन्छ ।

एकै दिन रिलिज भएका दुई नेपाली चलचित्र एकसाथ हिट भएको रेकर्ड खासै छैन । यदि अब भयो भने त्यो सुखद अपवाद हुनेछ । तीन करोडभन्दा माथिको बजेटमा बनेको चलचित्रले लगानी उठाउन १० करोडभन्दा माथिको व्यापार गर्नुपर्ने हुन्छ । यदि दुवै चलचित्र सफल भए भने नेपालको फिल्म बजारले ठूलो फड्को मारेको मान्नुपर्नेछ ।