अखबार नेपाल ट्रेन्डिङ

काठमाडौं: नयाँ डिजाइनका फर्निचर र सजावटका सामान प्रदर्शनी भृकुटीमण्डपमा भईरहेको छ । मिडिया स्पेस सोलुसन्स प्रालि र फ्युचरेक्स एण्ड इभेन्ट्सको संयुक्त आयोजनामा जारी नेपाल उड अन्तर्राष्ट्रिय प्रदर्शनीमा फर्निचर मात्रै नभइ इन्टेरियर डेकोरेसनका थुप्रै सामानहरु प्रदर्शनीमा छन् ।

गत शुक्रबारबाट सुरू भएको फर्निचर मेलामा धेरै अवलोकनकर्ताहरुले अवलोकन गरिसकेका छन् । करिब दुई सयभन्दा बढी ब्राण्डका उत्पादक सहभागी १ सय ५० भन्दा बढी स्टलहरुमा अवलोकनकर्ताको भीड रहेको मिडिया स्पेस सोलुसन्सले जनाएको छ । काठ र प्लाइवुडबाट निर्मित सामाग्रीसँगै घर तथा अफिस सजावटका अत्याधुनिक उत्पादनहरूबारे अवलोकनकर्ताले रुचिपूर्वक जानकारी लिइरहेको आयोजकले बताएको छ ।

फर्निचर, प्लाइवुड तथा काठ ‌औजारका कम्पनी, डिलर, सबडिलर र बिक्रेताहरुले काठ व्यवसायसँग सम्बन्धित उत्पादनहरुको बारेमा जानकारी गराउनका लागि यो प्रदर्शनी गरिएको र संसारभरीका नाम चलेका कम्पनी तथा ब्राण्ड सहभागी भएर स्वदेशी र विदेशी चर्चित ब्राण्डलाई एकैथलोमा हेर्न पाउनु नेपाली उपभोक्ताका लागि अवसर भएको आयोजक मिडिया स्पेस सोलुसन्स प्रालि र फ्युचरेक्स एण्ड इभेन्ट्सको भनाई छ ।