अखबार नेपाल ट्रेन्डिङ

काठमाडौं: चालू आर्थिक वर्षको पहिलो महिना सकिएसँगै सरकारको आम्दानी ७५ अर्ब ५५ करोड रुपैयाँ भएको छ । पहिलो महिना सकिँदा संघीय सरकारको आम्दानी ८४ अर्ब ८१ करोड रुपैयाँ भएको छ ।

त्यस्तै, सरकारले खर्च भने ३४ अर्ब ३६ करोड रुपैयाँ गरेको छ । त्यसमा चालू तर्फको खर्च ११ अर्ब ५१ करोड रुपैयाँ रहेको छ भने पुँजीगत तर्फ सरकारले ७७ करोड ९१ लाख रुपैयाँ खर्चिएको छ । वित्तीय व्यवस्थापनमा भने सरकारले २२ अर्ब रुपैयाँ खर्चिएको छ ।

चालू आर्थिक वर्षको राजस्वको लक्ष्य १४ खर्ब २२ अर्ब रुपैयाँ छ भने सरकारले १७ खर्ब ५१ खर्बको खर्च लक्ष्य प्रस्तुत गरेको छ ।

चालू आर्थिक वर्षका लागि सरकारले १७ खर्ब ५१ अर्ब ३१ करोड रुपैयाँ बजेट विनियोजन गरेको छ । जसमध्ये चालुतर्फ ११ खर्ब ४१ अर्ब ७८ करोड रुपैयाँ अर्थात् कुल विनियोजनको ६५ दशमलव २० प्रतिशत रहेको छ ।

यस्तै, पुँजीगततर्फ १७ दशमलव २५ प्रतिशत अर्थात ३ खर्ब २ अर्ब ७ करोड र वित्तीय व्यवस्थापनतर्फ ३ खर्ब ७ अर्ब ४५ करोड रुपैयाँ विनियोजन गरेको छ। यो रकम कुल विनियोजनको १७ दशमलव ५५ प्रतिशत हो ।

यस्तै, प्रदेश र स्थानीय तहमा वित्तीय हस्तान्तरणतर्फ ४ खर्ब ८ करोड रुपैयाँ रहेको छ । चालू आर्थिक वर्षका लागि अनुमान गरिएको व्ययको स्रोत राजश्व परिचालनबाट १२ खर्ब ४८ अर्ब ६२ करोड रुपैयाँ रहेको छ ।

वैदेशिक अनुदानबाट ४९ अर्ब ९४ करोड व्यहोर्दा  ४ खर्ब ५२ अर्ब ७५ करोड रुपैयाँ न्यून हुने भएको छ । उक्त न्यूनता पूर्ति गर्न वैदेशिक ऋणबाट २ खर्ब १२ अर्ब ७५ करोड रुपैयाँ जुटाइने बताइएको छ ।

राजस्व परिचालन र वैदेशिक अनुदान तथा ऋण सहायता परिचालन गर्दा नपुग हुने खुद २ खर्ब ४० अर्ब आन्तरिक ऋणबाट व्यहोरिने भएको छ ।