अखबार नेपाल ट्रेन्डिङ

काठमाडौं : इमर्जिङ नेपाल लिमिटेडले आजदेखि सर्वसाधारणका लागि साधारण शेयर बिक्री खुला गरेको छ ।

कम्पनीले प्रतिकित्ता १०० रूपैयाँ अंकित मूल्यमा ५ करोड ५५ लाख ६० हजार रूपैयाँ बराबरको पाँच लाख ५५ हजार ६ सय कित्ता प्रारम्भिक सार्वजनिक निष्काशन (आइपिओ)को बिक्री खुला गरेको हो ।

कम्पनीले निष्काशन गर्ने साधारण शेयरमध्ये पाँच प्रतिशत अर्थात् २७ हजार ७ सय ८० कित्ता सामूहिक लगानी कोषका लागि छुट्याएको छ भने २% अर्थात् ११ हजार १ सय १२ कित्ता साधारण शेयर कर्मचारीका लागि सुरक्षित गरी बाँकी रहने ५ लाख १६ हजार ७ सय ८ कित्ता शेयर खरिदका लागि सर्वसाधारणले आवेदन दिन पाउने कम्पनीले जारी गरेको आह्वानपत्रमा उल्लेख छ ।

निष्काशित शेयरमा सर्वसाधारणले आगामी फागुन १ गतेसम्ममा न्यूनतम १० कित्तादेखि अधिकतम एक हजार कित्तासम्मका लागि आवेदन दिन पाउनेछन् ।

तोकिएको अवधिसम्म मागबमोजिम आवेदन नआए फागुन ११ गतेसम्म शेयर निष्काशन खुला रहने कम्पनीले जनाएको छ ।

राष्ट्रिय प्राथमिकताका क्षेत्र अन्तर्गतका पूर्वाधारको विकास, यातायात, सञ्चार, ऊर्जा, पर्यटन, उद्योग, स्वास्थ्य, कृषि, वित्तीय र अन्य आर्थिकरूपमा महत्व भएका योजनामा लगानी गर्ने उद्देश्य भएको कम्पनीको पूँजी संरचना अन्तर्गत पाँच अर्ब रूपैयाँ अधिकृत पूँजी छ ।

कम्पनीको हालको जारी पूँजी ५५ करोड ५६ लाख रूपैयाँ बराबरको तथा चुक्ता पूँजी ५० करोड ४० लाख रूपैयाँ छ ।

विवरणपत्र मार्फत सर्वसाधारणलाई खरिदका लागि खुला गरेको शेयरको बाँडफाँटपछि कम्पनीको चुक्ता पूँजी ५५ करोड ५६ लाख रूपैयाँ पुग्नेछ ।

धितोपत्रको सार्वजनिक निष्काशन गर्दा क्रेडिट रेटिङ गर्नुपर्ने व्यवस्थाअनुसार रेटिङ गर्दा इक्रा नेपालले कम्पनीलाई ‘इक्रा एनपी आइआर बिबी प्लस’ ग्रेडिङ प्रदान गरेको छ ।