अखबार नेपाल ट्रेन्डिङ

काठमाडौं:  माछापुच्छ्रे बैंकले कात्तिक ६ गतेको लागि तय गरेको २२ औं वार्षिक साधारण सभा स्थगित गरेको छ । बैंकले आगामी साधारण सभामा अनुमोदन गराउने गरी अन्तरिम लाभांश दिने भएको छ ।

बैंकको असोज ३० गतेको सञ्चालक समितिको बैठकले शेयरधनीहरुलाई परेको आर्थिक प्रभाव एवं दशै तिहारलाई मध्यनजर गरी २ दशमलव ८५ प्रतिशतका दरले रू. २४ करोड १० लाख ८० हजार ६६० दशमलव २५ अन्तरिम लाभांश दिने भएको हो ।

बैंकले कोरोना संक्रमण बृद्धि भैरहेको र दशैं नजिक भएकाले सदस्यहरु सहभागी हुन समस्या हुने भन्दै सभा स्थगित गरेको हो । सभाले बैंकको सञ्चालक समितिले असोज १ गते प्रस्ताव ७ दशमलव शून्य ३ प्रतिशत बोनस शेयर र ३ दशमलव ३७ प्रतिशत कर सहित नगद लाभांश दिने प्रस्ताव पारित गर्ने कार्यक्रम थियो ।

सभाले लाभांश सहित अन्य कुनै बैंक तथा वित्तीय संस्थासँग मर्जर या एक्विजिसन गर्न तथा बैदेशिक रणनीतिक साझेदारीमा जान उपयुक्त देखिएमा सो सम्बन्धि सम्पूर्ण कार्य गर्न सञ्चालन समितिलाई अख्तियारी दिने प्रस्ताव पारित गर्ने कार्यक्रम रहेको थियो ।

साथै , सर्वसाधारण शेयरधनीको तर्फबाट सञ्चालक समितिमा प्रतिनिधित्व गर्ने तीन जना सञ्चालक निर्वाचन समेत सभा गर्ने कार्यक्रम थियो । उल्लेखित सबै प्रस्तावहरु यथावत रहने गरी बैंकले अर्को सुचना जारी नभएसम्मका लागि सभा स्थगित गरेको हो ।