सार्वजनिक यातायातले पुरानै भाडा लिदै सबै सिटमा यात्रु राख्न पाउने
वि.सं.२०७७ असोज २७ मंगलवार ०८:५१
काठमाडौं : ५० प्रतिशत भाडा लिई एक सिटमा मात्रै यात्रु चढाउदै आएका सार्वजनिक यातायातले अब पुरै सिटमा यात्रु राख्न पाउने भएको छ ।
सरकारले आज मंगलबारबाट लागु हुने गरी सार्वजनिक यातायातले पुरै सिटमा यात्रु राख्न पाउने निर्णय गरेको हो । तर त्यसको लागि पहिलेकै भाडा लिनुपर्ने निर्णय सरकारले गरेको छ ।
यसअघि आफूहरुले सबै सिटमा यात्रु राखेर चलाउन पाउनुपर्ने माग यातायात व्यवसायीहरुले गरेका थिए ।
यातायात व्यवसायीको मागलाई स्वीकार्दै सरकारले पुरै सिटमा यात्रु राखेर चलाउन पाउने व्यवस्था गरेको सरकारका प्रवक्ता प्रदीप ज्ञवालीले जानकारी दिएका हुन ।
यातायात व्यवसायीले कोरोना सङ्क्रमण फैलन नदिन स्वास्थ्य मापदण्ड भने अनिवार्य पालना गर्नुपर्ने बताईएको छ ।
दशैं, तिहार जस्ता चाडपर्वको समयमा यात्रुको चाप बढी हुने भएकाले सार्वजनिक यातायातमा पनि सामाजिक सुरक्षाका मापदण्ड अपनाएर पूरा क्षमतामा यात्रु राख्न दिने र भाडा पुरानैै दरमा लिनुपर्ने सरकारले निर्णय गरेको हो ।
कोरोना भाइरसका कारण सार्वजनिक यातायातमा यात्रुहरु नचढ्नाले यात्रु कम हुने भएपछि दशैंको लागि अग्रिम टिकट बुकिङ हालसम्म खुलेको छैन ।
वि.सं.२०७७ असोज २७ मंगलवार ०८:५१