अखबार नेपाल ट्रेन्डिङ

काठमाडौं : देशभर कोरोना संक्रमण झन तीव्र रुपमा बढेको देखिएको छ । बितेको २४ घण्टामा नोभेल कोरोना भाइरसका थप दुई हजार ५९ संक्रमित फेला परेको स्वास्थ्य मन्त्रालयले जनाएको छ।

कोरोनाको बारेमा दैनिक जानकारी दिदै आएको स्वास्थ्य तथा जनसंख्या मन्त्रालयले आज उक्त संख्यामा कोरोना संक्रमण भएको बताएको हो ।

मन्त्रालयका प्रवक्ता डा. जागेश्‍वर गौतमका अनुसार पछिल्लो २४ घण्टामा देशभर दुई हजार ५९ संक्रमित थपिएका हुन् । आजसम्म सक्रिय संक्रमितको संख्या २७ हजार ५३ रहेको छ ।

पछिल्लो २४ घण्टामा एक हजार ८० जना देशभरका विभिन्‍न अस्पतालबाट डिस्चार्ज भएका छन् भने ७३ हजार २३ जना डिस्चार्ज भएका छन् ।

पछिल्लो २४ घण्टामा देशभरका प्रयोगशालाहरुमा १३ हजार २७९ जनाको पीसीआर परीक्षण गरिएको मन्त्रालयले जनाएको छ । आजसम्म ११ लाख ४५ हजार २३७ जनाको पीसीआर परीक्षण गरिएको हो।

देशभरका संस्थागत आइसोलेसन ११ हजार १७६ जना र होम आइसोलेसनमा १५ हजार ८७७ जना रहेका छन् भने आजसम्म देशभर ४ हजार ७०३ जना क्‍वारेन्टिनमा रहेका छन् ।

देशभर ७५ जनाको भेन्टिलेटरमा उपचार भइरहको र देशभर ३१८ जना आईसीयूमा राखेर उपचार भइरहेको छ । यससँगै कुल संक्रमितको संख्या एक लाख ६७६ पुगेको छ ।

कोरोनाका कारण हालसम्म ६०० जनाको मृत्यु भएको छ भने ७३ हजार २३ जना संक्रमणमुक्त भएका छन् ।