अखबार नेपाल ट्रेन्डिङ

काठमाडौं: विशेष अदालतले नेपाली कांग्रेसका उपसभापति विजयकुमार गच्छदारविरुद्ध बालुवाटारको ललिता निवास जग्गा प्रकरणमा आदालत उपस्थित हुन १५ दिने म्याद जारी गरेको छ।

सरकारी जग्गा व्यक्तिका नाममा नामसारी गर्ने कार्यमा संलग्न रहेको अभियोग लगाइएका गच्छदारसहित अन्य ७४ जना प्रतिवादीविरुद्ध १५ दिनभित्र अदालतमा हाजिर हुन भन्दै म्याद जारी गरिएको विशेषा अदालतले जनाएको छ ।

विशेष अदालतले अख्तियार दुरुपयोग अनुसन्धान आयोगका पूर्व प्रमुख आयुक्त दीप बस्न्यात, भाटभटेनी सुपर मार्केटका सञ्चालक मिनबहादुर गुरुङ, गैर आवासीय नेपाली संघ सहित कल्पना तुलाधर, शर्मिला शाक्य विरुद्ध म्याद जारी गरेको हो ।

उक्त प्रकरणमा मुछिएका पूर्वमन्त्रीहरु डम्बर श्रेष्ठ र छविराज पन्तविरुद्ध पनि म्याद जारी गरिसकेको छ । अख्तियार दुरुपयोग अनुसन्धान आयोगले बालुवाटारको ललिता निवासको सरकारी जग्गा व्यक्तिका नाममा नामसारी गरेको अभियोगमा गत माघ २२ गते १ सय १० जनाविरुद्ध विशेष अदालतमा भ्रष्टाचार मुद्दा दायर गरेको थियो । भ्रष्टाचारको आरोप लागेका ११० मध्ये ४४ र जग्गा जफत प्रयोजनका लागि प्रतिवादी बनाइएका ६५ मध्ये ३० जनाको नाममा म्याद जारी भएको हो ।