अखबार नेपाल ट्रेन्डिङ

काठमाडौं: सत्तारुढ नेकपाको जारी केन्द्रीय कमिटी बैठकमा आज अध्यक्षद्वय र महासचिवले जवाफ दिने कार्यसूची तय भएको छ । चार दिनदेखि जारी बैठकमा केन्द्रीय सदस्यहरुले समूहगत रूपमा उठाएका प्रश्नको आज नेतृत्वले जवाफ दिने भएको हो ।

अध्यक्षद्वय केपी शर्मा ओली र पुष्पकमल दाहालको राजनीतिक प्रतिवेदन, महासचिव विष्णु पौडेलको सांगठनिक प्रतिवेदन तथा विधान संशोधन प्रस्ताव एवम् समसामयिक विषयमा केन्द्रीय सदस्यले उठाएका प्रश्नको आज सचिवालयका सम्बन्धित सदस्यले जवाफ दिने कार्यसूची रहेको छ ।

दिउँसो १ बजे राष्ट्रियसभा गृहमा सुरु हुने बैठकमा अध्यक्षद्वय र महासचिवको प्रतिवेदन तथा विधान संशोधन प्रस्ताव पारित गर्ने कार्यसूची रहेको नेकपाका प्रचार विभाग उपप्रमुख सुर्य थापाले जानकारी दिनुभयो । आजको बैठकमा प्रधानमन्त्री एवं अध्यक्ष केपी शर्मा ओली पनि उपस्थित हुनुहुने छ । बुधबारदिख सुरु भएको नेकपा बैठकमा ४ सय ४१ जना केन्द्रीय सदस्यले विभिन्न १५ वटा समूह बनाई छलफल गरेका थिए । छलफलपछि निष्कर्षका क्रममा अधिकांश टोली नेताले पार्टी र सरकारलाई सुशासन कायम राख्न, भ्रष्टाचारीलाई कडा कारबाही गर्न तथा जनअपेक्षा अनुसारका काम गर्न सुझाव दिएका छन् ।

त्यस्तै संसदबाट पारित गराउन लागिएको मिलिनियम च्यालेन्ज कर्पोरेशन एमसीसीबारे पनि व्यापक छलफल भएको थियो । छलफलमा भाग लिने अधिकांश केन्द्रीय सदस्यहरुले एमसीसीको विरोध गरेका छन् । एमसीसीबारे बोल्ने नेताहरुले आर्थिक सहयोग नलिइ नहुने हो भने नेपालको संविधान र कानुन विपरित रहेका सम्झौताका केही बुँदा परिमार्जन गर्नुपर्नेमा जोड दिएका छन् । त्यस्तै आजै नेकपा सचिवालय बैठक पनि बस्दै छ ।