अखबार नेपाल ट्रेन्डिङ

काठमाडौं: उपसभामुख डा. शिवमाया तुम्बाहाङफेले राजीनामा दिएकी छन् । सत्तारुढ नेपाल कम्युनिस्ट पार्टी (नेकपा)ले सभामुखमा अग्नि सापकोटालाई उम्मेदवार बनाउने निर्णय गरेको भोलिपल्ट संसद बैठक राखेर तुम्बाहाङ्फले राजीनामा दिने घोषणा गरेकी हुन् । राजीनामा लगतै संसद सचिवालयमा राजीनामा पत्र दर्ता गराएकी छन् ।

तत्कालीन सभामुख कृष्णबहादुर महराले राजीनामा दिएपछि तुम्बाहाङफेले सभामुखमा दाबी गरेकी थिइन् । सत्तारुढ नेकपाको सचिवालयले राजीनामा दिन आग्रह गर्दासमेत उनले आफूलाई सभामुख बनाउने निर्णय गर्नुपर्ने शर्त राखेकी थिइन् । सोमबार उपसभामुखबाट राजीनामा दिँदा पनि उनले सभामुखमा आफ्नो दाबी स्वभाविक भएको बताइन् ।

तुम्बाहाङफेले घुमाउरो शैलीमा नेकपाले राजीनामा दिन गरेको आग्रहको पनि कारण खुलाइन् । एउटा अप्रत्यासित र अस्वभाविक परिस्थितिका कारण सभामुख पद रिक्त भएको भन्दै उनले भनिन्, ‘सार्वभौम संसदको महत्वपूर्ण अंग प्रतिनिधिसभा लामो समय सभामुखविहीन हुँदा उत्पन्न जटिलता र यसले सिर्जना गरेका समस्याबारे हामी जानकार नै छौं । यस्तो स्थिति अव कायम रहनु हुँदैन । सभामुख चयनको ठोस आधार तय भएपछि आफूले मार्गप्रशस्त गर्ने भनेर आफूले राख्दै आएका मान्यता सम्मानित सदन समक्ष अभिलेखित गराउन चाहन्छु ।’ उपसभामुख रहँदा आफूले इमान्दारितापूर्वक कर्तव्य पूरा गर्ने प्रयास गरेको समेत उनले बताइन् ।

सदनमा सम्बोधनपछि बाहिरिएपछि पत्रकारहरूसँग कुरा गर्दै डा तुम्बाहाङ्फेले आफू दलको नभई प्रतिनिधिसभाको उपसभामुख भएकाले आफूले दलको निर्णय अटेर गरेको उनको दाबी थियो । तर दलहरुले आफूसँग राजीनामाका लागि आग्रह नगरेकाले पनि आफूले अटेर गरेको उनको भनाइ छ । ‘आग्रह गरेको भए मान्थें । तर पार्टीले आफूलाई दलको मात्र उपसभामुखको व्यवहार गर्‌यो ।’

संविधानले नेतृत्वबिहीन प्रतिनिधिसभाको कल्पना नगरेकाले पनि आफूले राजीनामा दिन आवश्यक नरहेको ठम्याएको उनको भनाइ छ । ‘संविधानले नेतृत्वविहीन परिकल्पना गरेको छैन । नेताले भनेको आधारमा होइन, संविधान अनुसार चलें । मैले नेकपा नेताको निर्देशन मानेको भए नागरिकले औला उठाउँथे ।’