अखबार नेपाल ट्रेन्डिङ

धनुषाः धनुषाको मिथिला नगरपालिका-५ स्थित औरही खोलामा बालुवा चोरी रोक्न गएका दिलिप भनिने ओमप्रकाश महतोको सुनियोजित तरिकाले हत्या गरिएको तथ्य सार्वजनिक भएको छ ।

जिल्ला प्रहरी कार्यालय धनुषाले गएराति पत्रकार सम्मेलनको आयोजना गरी हत्याको विवरण र पक्राउ परेका चार जनालाई सार्वजनिक गरेको हो । अवैद्य उत्खनको विरोध गर्दै आएका दिलिपलाई शुक्रबार बिहान खोलामा पुगेपछि स्थानीय क्रसर संचालक लगायतका व्यक्तिहरुले उनलाई नियन्त्रणमा लिएका थिए । त्यसपछि फलामको लिभरले दाहिने कोखामा घोचेर घाइते बनाई टिपरले किचेर हत्या गरिएको प्रहरीको प्रारम्भिक अनुसन्धानबाट पत्ता लागेको छ ।

हत्यामा सलंग्न रहेका मिथिला नगरपालिका-५ बस्ने चुरीयामाई बालुवा प्रशोधन उद्योगका संचालक विपिन कुमार महतो, महोत्तरीको बर्दिबास नगरपालिका-९ बस्ने टीपर चालक मुनिन्द्र महतो, बर्दिबास-२ बस्ने लोडर चालक जितेन्द्र कुमार महतो र दिलिपका साथी रोशन कुमार यादवलाई पक्राउ गरि सार्वजनिक गरिएको हो । हत्यामा अन्य व्यक्तिहरुको पनि संलग्नता हुन सक्ने प्रहरीको आशंका छ ।