अखबार नेपाल ट्रेन्डिङ

काठमाडौः सहिद स्मारक ए डिभिजन लिग अन्तर्गत पाँचौं चरणका खेल आजबाट सुरु हुँदैछ । खराब मौसमका कारण दुइदिन पर धकेलिएको प्रतियोगितामा आज पाँचौं चरणका दुइ खेल हुनेछन् । पहिलो खेलमा न्युरोड टिम एनआरटी र जावलाखेल युथ क्लबबीच हुनेछ । त्यस्तै अपरान्ह दोस्रो खेलमा मछिन्द्र क्लब र साविक विजेता मनाङ भिड्नेछन् ।

यस खेलले लिगको शीर्ष स्थानको टुंगो समेत लगाउने छ । मनाङबाट खेल्दै आएका ७ खेलाडी अहिले मछिन्द्रमा रहेकाले यस खेललाई सबैको प्रतिक्षाको खेलका रुपमा हेरिएको छ । पाँचौं चरण अन्तर्गत मंगलबार एक खेल मात्रै हुनेछ । जसमा फ्रेन्ड्स क्लब र हिमालयन शेर्पा क्लब भिडनेछन् । लिग अन्तर्गत बुधबार दुई खेल हुनेछन् ।

पहिलो खेलमा ब्रिगेड ब्वाइज र थ्री स्टार क्लब तथा दोस्रो खेलमा च्यासल युथ र नेपाल पुलिस क्लबबीच भिडन्त हुनेछ । पाँचौं चरणको खेलको अन्तिम दिन बिहीबार संकटा क्लब र एपीएफ तथा त्रिभुवन आर्मी र सरस्वती युथबीच प्रतिस्पर्धा हुनेछ । पाँचौं चरणका सम्पूर्ण खेलहरु त्रिपुरेश्वरस्थित दशरथ रंगशालामा हुने अखिल नेपाल फुटबल संघले जनाएको छ ।