अखबार नेपाल ट्रेन्डिङ

काठमाडौः सरकार र उखुको भुक्तानीका माग गर्दै आन्दोलनरत किसानबीच पाँचबुँदे सहमति भएको छ । सरकारले निर्धारण गरेको उखुको मूल्य बमोजिमको सम्पूर्ण बक्यौता रकम चिनी उद्योगीहरुले आउँदो माघ ७ गतेभित्र भुक्तानी गरिसक्ने व्यवस्था मन्त्रालयले मिलाउने भएपछि किसान र सरकारबीच सहमति भएको हो ।

उद्योगमन्त्री लेखराज भट्टको उपस्थितिमा उद्योग वाणिज्य तथा आपूर्ति मन्त्रालयमा शुक्रबार भएको छलफलपछि पाँच बुँदे सहमति भएको हो । त्यस्तै भुक्तानीको समस्या हल गर्न स्वचालित मूल्यप्रणाली बनाउने सम्बन्धमा अध्ययन गरी प्रतिवेदन दिन मन्त्रालयका सहसचिवको संयोजकत्वमा चिनी उद्योगी, किसान प्रतिनिधि र विज्ञसमेत सरोकारवाला निकायका प्रतिनिधिरहेको कार्यदल गठन गर्ने सहमति समेत भएको छ । सहमतिसँगै उखु किसानहरुले आन्दोलनका सम्पूर्ण गतिविधिहरु स्थगित गर्ने भएका छन् ।