अखबार नेपाल ट्रेन्डिङ

एजेन्सीः अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ–उनबीचको शिखर वार्ता बिना कुनै निष्कर्ष सकिएको छ ।

उत्तर कोरियाले आफूमाथि लगाइँदै आएको प्रतिबन्ध हटाउन राखेको माग अमेरिकाले अस्वीकार गरेपछि वार्ता निष्कर्षविहीन बनेको हो । वार्तापछि सञ्चारकर्मीहरुसँग कुराकानी गर्दै अमेरिकी राष्ट्रपतिले भने, ‘उनीहरु आफूहरुमाथि लगाइएका सबै प्रतिबन्ध फुकुवा होस् भन्ने चाहन्थे । हामी त्यसो गर्न सक्दैनौँ ।’

यस वार्तापछि दुवै पक्षले परमाणु निःशस्त्रीकरणमा भइरहेको प्रगतिबारे जानकारी दिने अपेक्षा गरिएको थियो । भियतनामको हानोईमा आयोजित पत्रकार सम्मेलनमा ट्रम्पले तेस्रो सम्मेलनका लागि कुनै योजना तयार नभएको बताए ।

ह्वाइट हाउसले दुई नेताको वार्तापछि संयुक्त वक्तव्यमा हस्ताक्षर गर्ने र लञ्चको कार्यक्रम तय गरेको थियो तर वार्ता निष्कर्षविहीन बनेपछि दुवै कार्यक्रम रद्द गरिएको थियो । ट्रम्पका अनुसार किमले आफ्नो परमाणु कार्यक्रमको केन्द्र मानिने योङब्योन कम्प्लेक्सलाई भत्काउने प्रस्ताव अघि सारेको थियो ।

तर, बदलामा उनले आफूमाथि लगाइएका सबै प्रतिबन्ध फुकुवा गर्नुपर्ने माग अघि सारेका थिए । यसका लागि अमेरिका तयार भएन । योङब्योनलाई उत्तर कोरियाको प्लुटोनियमको एक मात्र स्रोत मानिन्छ । तर, देशमा यस्ता अन्य दुई स्थान रहेको अनुमान छ । पत्रकार सम्मेलनमा यसतर्फ संकेत गर्दै ट्रम्पले किमले आफूलाई योङब्योनमात्र नष्ट गर्ने तर उत्तर कोरियाको सबै परमाणु कार्यक्रम स्थल नष्ट गर्ने प्रतिबद्धता नजनाएको बताएका थिए ।

के यो ट्रम्पका लागि धक्का हो ?

सन् २०१८ को जुनमा सिंगापुरमा आयोजित पहिलो शिखर सम्मेलनले ठोस निर्णय र प्रगति गर्न नसकेको भन्दै आलोचना भएको थियो । त्यही भएर दुई नेताबीचको दोस्रो भेटमा परमाणु निःशस्त्रीकरणबारे ठोस विषयमा सहमति हुने अपेक्षा गरिएको थियो । यो वार्ता असफल भएपछि यो ट्रम्पका लागि ठूलो धक्का भएको विश्लेषकहरुको भनाई छ ।