अखबार नेपाल ट्रेन्डिङ

काठमाडौं: राष्ट्रिय विपद् जोखिम न्यूनीकरण तथा व्यवस्थापन प्राधिकरणले भोटेकोशीमा आएको भिषण बाढीमा परी हालसम्म ९०३ जनाको मृत्यु भएको पुष्टि गरेको छ । प्राधिकरणका अनुसार बाढीका कारण २६७ जना घाइते भएका छन् भने करिव ४ हजार ३४७ जना अझै सम्पर्कविहीन रहेका छन् । यस विपदबाट रसुवा, नुवाकोट, धादिङ, गोरखा, नवलपरासी पूर्व तथा पश्चिम, तनहुँ र चितवनलगायतका जिल्लाहरू प्रत्यक्ष रूपमा प्रभावित भएका छन् ।

प्रभावित क्षेत्रमा खोजी तथा उद्धार कार्यलाई तीव्र पारिएको प्राधिकरणकी प्रवक्ता शान्ति महतले जानकारी दिएकी छन् । उद्धारका लागि नेपाल प्रहरी, नेपाली सेना र सशस्त्र प्रहरी बल नेपालका गरी कुल २० हजार ८९९ जना सुरक्षाकर्मीहरू मैदानमा खटिएका छन् । सुरक्षा बलको सक्रियतामा हालसम्म बाढी-पहिरोमा फसेका १० हजार ४५९ जना नागरिकको सकुशल उद्धार भइसकेको छ । उद्धार उडानका क्रममा नेपाली सेनाको हेलिकप्टरमार्फत ३ हजार ३४४ जना नेपाली र २५२ जना विदेशी नागरिकलाई सुरक्षित स्थानमा पुर्‍याइएको छ । यसका लागि सेनाले हालसम्म ४११ पटक हवाई उडान भरिसकेको छ ।

सरकारले विपद् प्रभावित क्षेत्रमा तत्काल राहत पुर्‍याउने उद्देश्यले बजेट विनियोजन गरेको छ ।  जसअन्तर्गत मुख्य प्रभावित जिल्ला रसुवामा रु. १ करोड, नुवाकोटमा रु. १ करोड र धादिङमा रु. ५० लाख नगद राहत सहयोग उपलब्ध गराइएको छ । यसका साथै बाढीबाट प्रभावित १५ वटा स्थानीय तहहरूका लागि कुल रु. ६ करोड ७५ लाख हस्तान्तरण गरिएको छ । प्रभावित क्षेत्रहरूमा खाद्यान्न, गैरखाद्यान्न सामग्री, औषधि तथा आवश्यक स्वास्थ्य सामग्रीहरू निरन्तर पठाउने काम भइरहेको प्राधिकरणले जनाएको छ ।