अखबार नेपाल ट्रेन्डिङ

जाजरकोट: अविरल वर्षाका कारण जाजरकोटको भेरी नगरपालिकाका विभिन्न स्थानमा गएको पहिरोमा परी दुई जनाको मृत्यु भएको छ । पहिरोमा परी गम्भीर घाइते भएका भेरी नगरपालिका-२ का ५२ वर्षीय केदार कार्कीको उपचारका क्रममा शनिबार बिहान ४:५० बजे मेडिकल कलेज कोहलपुरमा मृत्यु भएको छ ।

यसअघि सोही वडाका ५४ वर्षीय उमासिंह खत्री आफ्नै घर भत्किएर पुरिएको अवस्थामा मृत फेला परेका थिए । साउन ३० गते दिउँसोदेखि परेको वर्षापछि भेरी नगरपालिका-२ रिसाङ तथा आसपासका क्षेत्रमा पहिरो जाँदा घरटहरा भत्किनुका साथै सर्वसाधारण विस्थापित भएका छन् । पहिरोमा परी अन्य ६ जना घाइते भएका छन् ।

गम्भीर घाइते ६० वर्षीय रामबहादुर शाही, ४५ वर्षीय सिद्धिबहादुर कामी र ५७ वर्षीया भद्राकली कार्कीलाई जाजरकोट जिल्ला अस्पतालमा प्रारम्भिक उपचारपछि थप उपचारका लागि कोहलपुर रिफर गरिएको छ । अन्य घाइतेको स्थानीय मेडिकलमा उपचार भइरहेको छ भने ३ जना उपचारपछि डिस्चार्ज भइसकेका छन् । पहिरो आएपछि भाग्ने क्रममा सोही वडाका ७० वर्षीय भीमबहादुर कार्की र ८७ वर्षीया रती खत्री सम्पर्कविहीन भएका छन्। उनीहरूको खोजी तथा उद्धारका लागि नेपाल प्रहरी, सशस्त्र प्रहरी र नेपाली सेनाको टोली खटिएको छ ।

पहिरोका कारण घर भत्किएपछि तथा जोखिम बढेपछि रिसाङ क्षेत्रका ६०-७० घरपरिवारका करिब दुई सय मानिसलाई स्थानीय त्रिभुवन आधारभूत विद्यालय तथा नजिकैका डाँडामा सुरक्षित रूपमा स्थानान्तरण गरिएको छ । बाटो अवरुद्ध भएका कारण सुरक्षाकर्मी पैदलै पुगेर खोज तथा उद्धार कार्य गरिरहेका छन् ।