अखबार नेपाल ट्रेन्डिङ

काठमाडौं: जारी फिफा विश्वकप २०२६ को अन्तिम १६ को खेलमा स्विट्जरल्यान्डले कोलम्बियालाई पेनाल्टी सुटआउटमा ४-३ गोल अन्तरले हराउँदै क्वाटरफाइनलमा पुगेको छ । निर्धारित ९० मिनेट र अतिरिक्त समय गोलरहित बराबरीमा टुंगिएपछि खेलको निर्णय पेनाल्टी सुटआउटबाट भएको थियो ।

जितसँगै स्विट्जरल्यान्डले सात दशकभन्दा लामो प्रतीक्षापछि पहिलो पटक विश्वकपको क्वाटरफाइनलमा पुगेको हो । निर्णायक पेनाल्टीमा रुबेन भार्गासले सहज गोल गरे । त्यसअघि कोलम्बियाका डाभिन्सन सान्चेजको प्रहार क्रसबारमा लागेको थियो भने कुचो हर्नान्डेजको पेनाल्टी स्विस गोलकिपर ग्रेगर कोबेलले रोकेका थिए ।

पहिलो हाफमा कोलम्बियाले खेलमा पकड बनाए पनि स्पष्ट गोल गर्ने अवसर सिर्जना गर्न सकेन । दोस्रो हाफमा पनि दुवै टोलीले गोलका स्पष्ट अवसर बनाउन सकेनन् । अतिरिक्त समयमा खेल थप रोमाञ्चक बन्यो । कोलम्बियाका झोन लुकुमीको हेडर क्रसबारमा लाग्यो । स्विट्जरल्यान्डका वैकल्पिक खेलाडी जेकी आमडौनीको प्रहार कामिलो भार्गासले रोके भने जामिन्टन काम्पाजले सुनौलो अवसर गुमाए ।

अन्ततः खेल पेनाल्टी सुटआउटमा पुग्यो । त्यहाँ स्विट्जरल्यान्डले ४–३ को जित निकाल्दै क्वार्टरफाईनल यात्रा तय गर्यो । अब स्विट्जरल्यान्डले क्वाटरफाइनलमा अर्जेन्टिनासँग प्रतिस्पर्धा गर्नेछ । साविक विजेता अर्जेन्टिनाले इजिप्टलाई ३-२ गोल अन्तरले हराउँदै क्वाटरफाइनल यात्रा सुरक्षित गरेको छ । योसँगै क्वाटरफाइनलको समीकरण पूरा भएको छ । फ्रान्स र मोरक्को , स्पेन र बेल्जियम तथा इङ्ल्यान्ड र नर्वेबीच क्वाटरफाइनल खेल हुनेछ ।