अखबार नेपाल ट्रेन्डिङ

काठमाडौं: अमेरिकी सहायता परियोजना मिलेनियम च्यालेन्ज कर्पोरेसन (एमसिसी) अन्तर्गत मिलेनियम च्यालेन्ज एकाउन्ट नेपालमातहत निर्माण हुने ४०० केभी डबल सर्किट प्रसारण लाइन अन्तर्गतका दुई खण्ड निर्माणको बोलपत्र स्वीकृत भएको छ ।

एमसिए नेपालका अनुसार न्यु दमौली-न्यु बुटवल प्रसारण लाइन र रातामाटे-न्यु दमौली प्रसारण लाइन निर्माणका लागि बिहीबार ठेकेदार कम्पनीसँग निर्माण सम्झौता हुँदै छ । कुल ३१५ किलोमिटरको प्रसारण लाइन परियोजना अन्तर्गत यसअघि १८ किलोमिटर सीमापार प्रसारण लाइन निर्माण गर्न ठेकेदार कम्पनीसँग सम्झौता भइसकेको छ । नवलपरासी (बर्दघाट सुस्तापश्चिम) मा निर्माणाधीन ४०० केभी क्षमताको नयाँ बुटवल सबस्टेसनदेखि नेपाल-भारत सीमासम्म १८ किलोमिटर प्रसारण लाइन बनाउन भारतीय कम्पनी ट्रान्सरेल लाइटिङ लिमिटेडसँग सम्झौता भएको थियो ।

बिहीबार ९० किलोमिटर लामो रातमाटे-न्यु दमौली प्रसारण लाइन निर्माणका लागि भारतको एनजेलिक-स्किपर संयुक्त उपक्रम (जेभी) सँग सम्झौता हुँदैछ । कम्पनीले उक्त लाइन निर्माण गर्न ७ करोड ७४ लाख ८० हजार अमेरिकी डलरमा ठेक्का पाएको छ । यो खण्डमा २४८ वटा टावरसहित प्रसारण लाइन बन्ने छ । त्यस्तै ७ करोड ७० लाख ३ हजार अमेरिकी डलरमा निर्माण गर्ने गरी न्यु दमौलीदेखि न्यु बुटवलसम्मको ९० किलोमिटर प्रसारण लाइन वाइबा-सलार जेभीले पाएको छ । सो प्रसारण लाइनमा २४९ वटा टावर निर्माण गरिने छ ।

न्यु बुटवल-नेपाल र भारत सीमाको ठेक्का सम्झौतापछि बाँकी २९७ किलोमिटर प्रसारण लाइन निर्माणका लागि गत वर्ष मङ्सिर १२ गते ठेक्का आह्वान गरिएको थियो । सो बमोजिम १८० किलोमिटर लामा दुई खण्डको लाइन निर्माण गर्न ठेक्का सम्झौता हुन लागेको हो । दुवै ठेक्काका अवधि ३६ महिना रहेको छ । प्रसारण लाइनका ५ खण्डमध्ये अब २ खण्डको निर्माण सम्झौता हुन बाँकी छ ।