अखबार नेपाल ट्रेन्डिङ

काठमाडौं: जारी सेन्ट्रल एसिया काभा वुमन्स नेसन्स भलिबल लिग अन्तर्गत आज नेपालले भारतको सामना गर्दैछ । त्रिपुरेश्वरस्थित राखेपको कभर्डहलमा आज दिउँसो ३ बजेदेखि खेल शुरु हुनेछ ।

यसअघि बिहीबार भएको उद्घाटन खेलमा नेपालले श्रीलंकालाई ३-० को सोझो सेटमा पराजित गरेर प्रतियोगितामा विजयी शुरुवात गरेको छ । नेपाल ३ अंकसहित दोस्रो स्थानमा रहेको छ । त्यस्तै भारतले भने इरान र माल्दिभ्सलाई पराजित गरेर ६ अंक हासिल गर्दै शीर्ष स्थानमा रहेको छ ।

आजको खेलपछि नेपालले आफ्नो तेस्रो खेल आइतबार साँझ ५:१५ बजेदेखि इरानसँग खेल्नेछ । त्यस्तै नेपालले आफ्नो लिग चरणको अन्तिम खेल सोमबार ५:१५ बजेदेखि माल्दिभ्सविरुद्ध खेल्ने तालिका रहेको छ ।

जारी प्रतियोगितामा नेपाल सहित भारत, श्रीलंका, माल्दिभ्स र इरानको सहभागिता रहेको छ । प्रतियोगिता साउन २३ गतेसम्म चल्नेछ ।