अखबार नेपाल ट्रेन्डिङ

काठमाडौं: नेपाली कांग्रेसका महामन्त्री गगन थापाले सत्ता गठबन्धनले देखाएको रवैया निरंकुशता उन्मुख रहेको बताएका छन् । आइतबार काठमाडौंमा नेपाल प्रेस युनिनयनको ३३औं स्थापना दिवसको अवसरमा आयोजना गरेको कार्यक्रममा बोल्दै उनले सत्ता गठजोडले देखाएको व्‍यवहार निरंकुशता उन्मुख र अनुदारवादी रहेको बताएका हुन् ।

महामन्त्री थापाले अहिलेको रवैयाले प्राप्त गरेको उपलब्धि गुमाउने खतरा कायम रहेको बताए । थापाले प्रेस स्वतन्त्रता भनेकै प्रजातन्त्र रहेको भन्दै प्रेसलाई अङ्कुश लगाउने काम गर्न नहुने बताए । थापाले प्रतिपक्षलाई संसद्मा नियन्त्रण र बाहिर प्रश्नलाई नियन्त्रण गर्ने राम्रो नरहेको बताए । महामन्त्री थापाले नेपाली कांग्रेसले अहिले लिएको अडान आम सर्वसाधारण नागरिकसँग जोडिएको बताए ।

महामन्त्री थापाले भने, ‘प्रेस स्वतन्त्रता भनेकै प्रजातन्त्र हो । प्रेसले प्रश्न उठाउन छोड्यो भने, त्यसले त्यहाँभित्रबाट आफ्नो दुबिधाहरू राख्न छोड्यो भने डेमोक्रेसी त मर्यो । त्यसैले कन्टेनमाथि सत्ताले कन्ट्रोल गर्नुहुँदैन । प्रतिपक्षलाई संसद्मा नियन्त्रण गर्ने, बाहिर प्रश्नलाई नियन्त्रण गर्ने । यो प्रयोग भइरहेको छ । मेरो बारेमा के लेख्यो भन्ने आधारमा मिडियालाई नियन्त्रण गर्न थाल्यो भने कहाँ पुग्छौँ हामी । नेपाली कांग्रेसले अहिले लिएको पोजिसन प्रकारान्तरले तपाईंहरुसँग जोडिएको छ । किनभने तपाईँ आज माइतीघरको मण्डलामा उभिएर एक जना निहत्था नागरिकले प्रश्न गर्न पाउनुपर्छ । हाम्रो विरोध प्रदर्शन जुन सत्ताले रवैया देखाइरहेको छ, निरङ्कुशता उन्मुख रवैया हो यो । यो जुन खालको गठजोड छ, यो गठजोडले देखाएको रवैया निरंकुशताउन्मुख छ, अनुदारवादी छ । यसले बिस्तारै बिस्तारै तपाईँ हामीले प्राप्त गरेको उपलब्धि गुमाउनेछौँ । अहिले बोल्ने बेला आएको छ ।’